Суперлига 11-турида сафарда “Бунёдкор”ни йирик 5:1 ҳисобида мағлуб этган “Навбаҳор” клуби бош мураббийи Самвел Бабаян ғалаба сири, профессионаллик, янги келиб қўшилган футболчилар ва Ўруновниг алмаштирилиши ҳақида гапирди.

“Бугун мавсумдаги энг яхши ўйинимизни ўтказдик дея оламан. Ғалаба учун футболчиларга раҳмат. Улар бугун ҳақиқий профессионал эканликларини исботлашди. Рақибдан ҳар жиҳатда устунлик қилдик, айниқса биринчи таймдаги ўйинимиз таҳсинга сазовор. Бугун ғалаба қозонсак жадвалда биринчи ўринга кўтарилардик. Бу ғалаба психологик жиҳатдан жуда муҳим эканлигини билардик”, - деди Бабаян.

“Бугун барча компонетларда рақибдан устунлик қилдик. Ўйинни ташкил этишда, тактикада ва бошқа жиҳатларда устунлик қилдик. Мавсум аввалида кўпчилик кетди, бошқалар келди. Асосийси – ўйин услубимизни сақлаб қолдик ва уни ўйинлар давомида сайқаллаштириб бораяпмиз. ”.

“Ўруновнинг аввалги ўйинда орттирган жароҳати асорати ҳали бор. Бугун уни масала деярли аниқ бўлиб улгурган вазиятда алмаштирдим”.