"Манчестер Сити" ёзда марказий ярим ҳимоячи позициясини мустаҳкамлаш ниятида. Хосеп Гвардиола жамоаси мавсум сўнгида клубдан текинга кетиши мумкин бўлган Илкай Гюндоганга ўринбосар қидирмоқда.
Журналист Мартин Блэкбёрннинг хабар беришича, "шаҳарликлар" ҳозирда майдон марказини кучайтириш учун учта футболчини кузатмоқда. Гап "Челси" ярим ҳимоячиси Матео Ковачич, "Брайтон" ярим ҳимоячиси Алексис Макаллистер ва "Сельта"дан Габри Вейга ҳақида кетмоқда.
Аввалроқ Ковачич бош мураббий Хосеп Гвардиола учун устувор вариант экани хабар қилинганди. Матеонинг ҳозирги клуби билан шартномаси тугашига бир йил қолди.
