"Аталанта" бош мураббийи Жан-Пьеро Гасперини "Наполи" бош мураббийи сифатида Лучано Спалетти ўрнини эгаллаши мумкинлиги ҳақидаги хабарга муносабат билдирди.
Tuttonapoli хабарига кўра, неаполликлар раҳбарияти мавсум охирида жамоани тарк этиши мумкин бўлган Спалетти ўрнига Гасперини номзодини кўриб чиқмоқда. Маълум бўлишича, мураббий клуб хўжайини Аурелио Де Лаурентис билан жанжаллашиб қолган.
“Яхшиямки, интернетда янгиликларни ўқишга вақтим йўқ, атрофда жуда кўп нарса бор, бирданига ҳаммасини кузатиб бориш қийин. Энг яхши ечим “Аталанта”нинг еврокубокларга чиқишини таъминлашга эътибор қаратиш бўлади”, - дея Гасперинининг сўзларини келтиради Football Italia.
Гасперини 2016 йилдан бери “Аталанта”га мураббийлик қилади ва шу вақт ичида у жамоани уч марта А Серияда учинчи ўринга олиб чиқди ва икки марта бергамоликлар билан Италия кубоги финалида ўйнади.
Спалетти "Наполи"ни 2021 йилдан бери бошқариб келмоқда. Жорий мавсумда унинг қўл остидаги жамоа 1990 йилдан бери биринчи марта муддатидан аввал Италия чемпионлигини қўлга киритди.
