"Atalanta" bosh murabbiyi Jan-Pyero Gasperini "Napoli" bosh murabbiyi sifatida Luchano Spaletti o‘rnini egallashi mumkinligi haqidagi xabarga munosabat bildirdi.

Tuttonapoli xabariga ko‘ra, neapolliklar rahbariyati mavsum oxirida jamoani tark etishi mumkin bo‘lgan Spaletti o‘rniga Gasperini nomzodini ko‘rib chiqmoqda. Ma’lum bo‘lishicha, murabbiy klub xo‘jayini Aurelio De Laurentis bilan janjallashib qolgan.

“Yaxshiyamki, internetda yangiliklarni o‘qishga vaqtim yo‘q, atrofda juda ko‘p narsa bor, birdaniga hammasini kuzatib borish qiyin. Eng yaxshi yechim “Atalanta”ning yevrokuboklarga chiqishini ta’minlashga e’tibor qaratish bo‘ladi”, - deya Gasperinining so‘zlarini keltiradi Football Italia.

Gasperini 2016 yildan beri “Atalanta”ga murabbiylik qiladi va shu vaqt ichida u jamoani uch marta A Seriyada uchinchi o‘ringa olib chiqdi va ikki marta bergamoliklar bilan Italiya kubogi finalida o‘ynadi.

Spaletti "Napoli"ni 2021 yildan beri boshqarib kelmoqda. Joriy mavsumda uning qo‘l ostidagi jamoa 1990 yildan beri birinchi marta muddatidan avval Italiya chempionligini qo‘lga kiritdi.