Хабарингиз бор, Ўзбекистон ўсмирлар терма жамоаси бош мураббийи Дилшод Нуралиев 9 октябрь куни журналистлар билан матбуот анжуманида иштирок этди. Матбуот анжуманидан кейин биз мутахассис билан яна 5-10 дақиқа суҳбатлашдик ва унда Дилшод ака ўзининг айрим ҳиссиётлари билан ўртоқлашди. Унинг энг кўп такрорлаган сўзи "2002 йилги воқеа такрорланармикан деб қўрққандим", бўлди. Ўшанда Нуралиев жамоаси Осиёда 4-ўринни эгаллган бўлса, Осиёга ЖЧ учун 3та ўрин берилганди.

"Мен Жанубий Кореянинг 10-рақамли футболчиси пенальтидан гол ура олмаслигини сезгандим", дейди Нуралиев. "Тўғри, у жуда яхши ўйинчи, зўр ҳужумчи, аммо бироз олифтароқ экан. Пенальти тепиш учун йўл олаётганда мураббийлар штабига: "У гол ура олмайди", дедим. Аммо ўзим унинг пенальти тепишига қарай олмадим. Бир маҳал бизникилар бақириб юборишди. Ўгирилиб қарасам, 10-рақамли ҳужумчи бошини ушлаб турибди. Умуман, мен ўша пенальтилар сериясининг бирорта зарбасини кузата олмадим. Юрагим дов бермади. Терс ўгирилиб олиб, фақат у ёқдан - бу ёққа юрдим".

"Саралаш босқичида ўзини кўрсатган Шоҳжаҳон Аббосовга нега кам имконият бердингиз?" деган саволга мураббий қуйидагича жавоб берди: "У "Машъал"да кам ўйин амалиётига эга бўлди. Унинг ўйин амалиёти билан Осиё чемпионати ўйинлари бир-бирига мос келмасди. Шундай бўлса-да, уни захирадан майдонга тушириб турдим. Аммо, энг асосийси, у Корея билан ўйинда энг сўнгги пенальтидан гол уриб, бизга ЖЧ йўлланмасини тақдим этди. Ўша зарба ўйиндаги руҳий жиҳатдан энг оғир вазият эди".

"Дарвоқе, - дейди Дилшод Нуралиев. - "Бунёдкор" клубига ҳам алоҳида миннатдорчилик билдирмоқчиман. Бу клуб сафидан терма жамоага жалб қилинган 3 нафар футболчи — Акромжон Комилов (№4), Улуғбек Давлатов (№6) ва Достонбек Ҳамдамов (№17) асосий таркибда ўйнаб, ғалабаларимизга муносиб ҳисса қўшишди. Мен бу футболчилардан ва уларни тарбиялаган клубдан миннатдорман".