Ўзбекистоннинг амалдаги чемпиони ҳамда кубоги соҳиби ўртасида ўтиши лозим бўлган Суперкубок учрашувига 24 август куни Жиззах мезбонлик қилади.
“Пахтакор” ва “Насаф” майдонга чиқадиган беллашув учун Жиззах нейтраллик мақомига тўла жавоб беради. Қолаверса, “Сўғдиёна” стадиони Лиганинг футбол майдонларига қўйган талабини бажариб улгурди. Бизда яхши савиядаги ўйин ташкил этиш имконияти мавжуд.
Маълумот учун, мавсум аввалида ўтиши лозим бўлган Суперкубок ўйини ОФК Чемпионлар лигаси тақвимига ўзгартириш киритгани ва бу “Насаф” режаларини ўзгартирганидан келиб чиқиб, кейинроққа қолдирилганди. Ўртада Ўзбекистон U 20 Осиё кубогига мезбонлик қилди. Кейинроқ бу ёшларимизнинг мундиалдаги иштирокига уланиб кетди.
Июн ойида эса Ўзбекистон миллий терма жамоаси CAFA мусобақасида иштирок этади. Бу ФИФА кунларидан ташқари саналарни ҳам ўз ичига олди. Референдум арафасида эса Суперлиганинг 1 та тури кейинроқ муддатга қолдирилди. Мазкур сабабларни инобатга олиб, Лига Суперкубок учрашувини жазирама июлда эмас, августда ўтказишни мақсадга мувофиқ деб топди ва бу борада ҳар икки клуб билан келишиб олди. Сентябрдан бошлаб эса “Пахтакор” ва “Насаф” Чемпионлар лигасида иштирок этади.
