УЕФА президенти Александр Чеферин Италия футбол федерацияси раҳбари Габриэле Гравина билан учрашди, деб хабар бермоқда La Gazzetta dello Sport нашри.
УЕФА раҳбари Федерация "Ювентус" билан молиявий фирибгарликда айбини тан олиш бўйича келишув тузганидан норозилигини билдирди. Чефериннинг фикрича, бу туринликларнинг янада қаттиқроқ жазоланишининг олдини олди - улар 10 дан ортиқ очкони олиб қўйишлари мумкин эди.
"Ювентус" адвокатлари маошлар билан боғлиқ фирибгарликларни кўриб чиқмаслик учун Федерация билан имкон қадар тезроқ келишиб олишни сўради. Агар бу ҳолат ўрганилса, клубдан ундан ҳам кўпроқ очко олиб қўйилиши мумкин эди, еврокубокларга йўл олиш имконияти қолмаган бўларди. Аммо Чеферин, агар жамоа мавсум охирида Европа Лигаси ёки Конференция Лигасига чиқса, УЕФА евротурнирларидан четлаштирилишини талаб қилади.
Чеферин ва "Ювентус" ўртасидаги муносабатлар ёмон, чунки клубнинг собиқ президенти Андреа Аньелли Суперлига ташкил этиш ғоясининг асосий тарафдорларидан бири эди.
А Сериянинг сўнгги тури олдидан “Ювентус” 7-ўринни эгаллаб турибди, бу эса жамоани Конференциялар лигасига йўллайди, аммо Европа Лигасига чиқиш учун ҳали ҳам имкониятлар мавжуд.
