Боку шаҳрида ўтказилаётган таэквондо бўйича жаҳон чемпионатида бугун икки нафар ҳамюртимиз баҳсларда иштирок этмоқда.

Аёллар ўртасида 62 кг. вазн тоифасида Феруза Содиқова ҳозиргина ярим финал йўлланмаси учун венгриялик Вивиана Мартонга қарши жанг қилди. Биринчи раундда ҳамюртимиз 18-10 ҳисобида ғалаба қозонди.

Иккинчи бўлимда эса венгриялик спортчи Ферузанинг тактикасини сезиб қолиб, ўз услубини ўзгартирди. Боз устига, рақиб ватандошимиз оёғининг сон қисмига зарба бериб, жароҳат етказди. Мартон орадан кўп ўтмасдан яна ўша нуқта зарба берди ва жароҳатни оғирлаштирди. Бу пайтда Содиқова 6-4 ҳисобида олдинда бораётганди.

Рақиб эса ҳамюртимизнинг жароҳат билан қийналиб жанг қилаётганини билган ҳолда тавакал қилиб олдинга ташланди. Феруза эса мураббий томонидан берилган кўрсатмага амал қилиб, ҳимояни бўш қолдирган рақибга зарбалар бера бошлади. Бўлим тугашига 30 сония қолганида ҳисобдаги фарқ атиги 3 очко эди. Содиқова эса сўнгги сонияларда рақибнинг бошига 2 марта зарба бериб, ҳисобни 23-10 кўринишига келтирган ҳолда ярим финалга чиқди.

Феруза ярим финалда Бразилия вакили Каролин Сантосга қарши даянга чиқади.

Эркаклар ўртасида 74 кг. вазнда таэквондочимиз Жасур Жайсунов чорак финалда австралиялик Лео Голубичга қарши даянга чиқди. Афсуски, ҳамюртимиз ҳамюртимиз икки раунд якунига кўра кичик ҳисобларда ютқазди — 7-11, 10-11. Шу тариқа, Жасур медаллардан қуруқ қолди.