Мадриднинг “Реал” клуби Карим Бенземани клуб тарихидаги энг буюк афсоналардан бири деб атади.
Испания клуби франциялик ҳужумчининг мавсум якунида жамоани тарк этиши юзасидан баёнот берди.
"Реал Мадрид" ва сардоримиз Карим Бензема клубимиз футболчиси сифатидаги ёрқин ва унутилмас даврини якунлашга келишиб олди. Бизнинг энг буюк афсоналаримиздан бири бўлган одамга ўз миннатдорчилигимизни билдирамиз.
Бензема клубимизга 2009 йилда бор-йўғи 21 ёшида келиб қўшилган эди. У тарихимизнинг олтин йилларида асосий ўйинчи бўлди.
У бизнинг нишонимиз ва либосимизни ҳимоя қилган ўн тўрт мавсумда 25 та чемпионликни қўлга киритди, бу "Реал Мадрид" учун рекорд кўрсаткич.
Бенземанинг "Реал Мадрид"даги фаолияти клубимиз қадриятларини ифодаловчи хатти-ҳаракатлар ва профессионаллик намунаси эди. Карим Бензема ўз келажагини ҳал қилиш ҳуқуқини қўлга киритди.
Мадридликлар ва бутун дунё мухлислари унинг сеҳрли ва бетакрор футболидан баҳраманд бўлишди. Бу уни клубимизнинг энг буюк афсоналаридан бирига ва жаҳон футболидаги энг буюк афсоналардан бирига айлантирди.
"Реал Мадрид" ҳар доим унинг уйи бўлган ва шундай бўлиб қолади. Биз унга ва бутун оиласига ҳаётининг янги босқичида энг яхши тилакларимизни тилаб қоламиз”, - дейилади Мадрид клуби баёнотида.
