Саудия Арабистони футбол клубларини хусусийлаштириш лойиҳасини бошлади.

Мамлакатда спортни ривожлантиришга қаратилган “Vision 2030” лойиҳаси доирасида Саудия Арабистони валиаҳд шаҳзодаси Муҳаммад бин Салмон Ал Сауд спорт клубларини сармоялаш ва хусусийлаштириш лойиҳасини ишга туширди.

Лойиҳа ҳозирги босқичда икки йўналишдан иборат. Биринчиси, йирик компанияларга ушбу жамоаларнинг эгалик ҳуқуқини уларга ўтказиш эвазига спорт клубларига сармоя киритиш имконини беради. Иккинчиси 2023 йил охиридан бошлаб бир қатор спорт клубларини хусусийлаштиришни назарда тутади.

Лойиҳанинг мақсади спорт соҳасига инвестиция имкониятларини ривожлантириш, шунингдек, клубларнинг рақобатбардошлигини ва инфратузилмасининг сифатини оширишдан иборат.

Қолаверса, лойиҳа туфайли мамлакатда футбол ва унинг рақобатини ривожлантириш кутилмоқда, бу эса “Саудия Арабистони лигасини дунёнинг топ 10 лигаси қаторига киритиш” имконини беради.

Саудия Арабистони чемпионатининг даромади йилига 450 миллион риалдан (112 миллион евро) 1,8 миллиард риалдан (450 миллион евро) ошиши, шунингдек, лига қийматининг 3 миллиарддан 8 миллиардга кўтарилиши кутилмоқда.

Саудия Арабистони чемпионатида бошқалар қатори “Ан-Наср”да тўп сураётган Криштиану Роналду ҳам ўйнайди. "Реал"нинг собиқ ҳужумчиси Карим Бензема тез орада маҳаллий "Ал-Иттиҳод"га ўтиши кутилмоқда. Шунингдек, Серхио Рамос, Серхио Бускетс, Н'Голо Канте ва Жорди Альба ҳам яқин орада Саудия клубларида пайдо бўлиб қолиши мумкин.