Saudiya Arabistoni futbol klublarini xususiylashtirish loyihasini boshladi.

Mamlakatda sportni rivojlantirishga qaratilgan “Vision 2030” loyihasi doirasida Saudiya Arabistoni valiahd shahzodasi Muhammad bin Salmon Al Saud sport klublarini sarmoyalash va xususiylashtirish loyihasini ishga tushirdi.

Loyiha hozirgi bosqichda ikki yo‘nalishdan iborat. Birinchisi, yirik kompaniyalarga ushbu jamoalarning egalik huquqini ularga o‘tkazish evaziga sport klublariga sarmoya kiritish imkonini beradi. Ikkinchisi 2023 yil oxiridan boshlab bir qator sport klublarini xususiylashtirishni nazarda tutadi.

Loyihaning maqsadi sport sohasiga investisiya imkoniyatlarini rivojlantirish, shuningdek, klublarning raqobatbardoshligini va infratuzilmasining sifatini oshirishdan iborat.

Qolaversa, loyiha tufayli mamlakatda futbol va uning raqobatini rivojlantirish kutilmoqda, bu esa “Saudiya Arabistoni ligasini dunyoning top 10 ligasi qatoriga kiritish” imkonini beradi.

Saudiya Arabistoni chempionatining daromadi yiliga 450 million rialdan (112 million yevro) 1,8 milliard rialdan (450 million yevro) oshishi, shuningdek, liga qiymatining 3 milliarddan 8 milliardga ko‘tarilishi kutilmoqda.

Saudiya Arabistoni chempionatida boshqalar qatori “An-Nasr”da to‘p surayotgan Krishtianu Ronaldu ham o‘ynaydi. "Real"ning sobiq hujumchisi Karim Benzema tez orada mahalliy "Al-Ittihod"ga o‘tishi kutilmoqda. Shuningdek, Serxio Ramos, Serxio Buskets, N'Golo Kante va Jordi Alba ham yaqin orada Saudiya klublarida paydo bo‘lib qolishi mumkin.