Ёзги трансфер ойнасида "Барселона" ярим ҳимоячиси Франк Кессиэ "Туманли Албион"га ўтиши мумкин. Аввалроқ Каталония клуби бош мураббийи Хави Эрнандес ярим ҳимоячига клубнинг у билан хайрлашиш нияти ҳақида айтгани хабар қилинганди.
Inter-News порталининг хабар беришича, мерсисайдликлар 26 ёшли футболчи учун 40 миллиондан 45 миллион еврогача таклиф қилишган. Қайд этилишича, ҳозирда “Интер”нинг Кессиэни трансфер қилиш имкониятлари нолга яқин.
Кессиэ ўтган ёзда "Барселона"га ўтган эди. Шу вақт ичида у барча мусобақаларда 43 та ўйинда майдонга тушиб, 3 та гол урди ва 3 та голли узатмани амалга оширди. Ярим ҳимоячининг клуб билан шартномаси 2026 йилгача мўлжалланган.
