Футзал бўйича Ўзбекистон миллий терма жамоаси 15 октябрь куни Тошкентда ўқув-машғулот йиғинларини бошлади. Тўрт кунлик йиғиндан сўнг терма Вьетнамнинг Хо Ши Мин шаҳрида ўтказиладиган, Вьетнам, Италия ва Кувайт терма жамоалари иштирок этадиган халқаро мусобақага йўл олади.

Терма жамоа бош мураббийи Хосе Мария Мендез Вьетнамдаги мусобақа бошлангунига қадар жамоа таркибини аниқлаб олишга муваффақ бўлди. Бунга ўтган ҳафта бўлиб ўтган футзал бўйича Ўзбекистон чемпионати 1-босқич 1-тур ўйинлари ёрдам берди. Пойтахтнинг «Бунёдкор» клуби сафидаги ишончли ўйинлари билан Ғулом Мамажонов яна терма жамоадан чақирув олди. Тошкентнинг «Локомотив» клуби ёш ўйинчиси Даврон Чориев ҳам Мендез эътиборига тушди. Умуман олганда, сўнгги Португалия йиғинидан кейин терма жамоа таркибида катта ўзгаришлар кузатилган йўқ.

Бахтга қарши, ушбу йиғинда бир қатор йўқотишлар ҳам бор. Хосе Мария Мендез бу сафар терма жамоа етакчиларидан бири – Умид Холматовдан фойдалана олмайди. «Максам-Чирчиқ» футзалчиси «Ардус»га қарши чемпионат ўйинида (3:8) жароҳат олганди.

Ўзбекистон терма жамоаси 19 октябрь куни оқшомда Вьетнамга йўл олади. Бу вақтга келиб Қозоғистон чемпионатида «БТА Футзал» клуби шарафини ҳимоя қилувчи уч нафар легионер футболчи ҳам сафга келиб қўшилади. Дилшод Ирсалиев, Олег Холмуҳамедов ва Фарҳод Абдумавлонов сафар куни терма жамоа таркибида бўлишади.

Қўшимча сифатида, Ўзбекистон футзал терма жамоасининг машғулотлари ҳар куни соат 10:00 ва 17:00да «Ўзбекистон» спорт мажмуасида ўтказилмоқда. Машғулотлар ОАВ ходимлари учун очиқдир.

ЎМЙга чақирилган Ўзбекистон терма жамоаси аъзолари