"Манчестер Сити" ярим ҳимоячиси Илкай Гюндоган бугун Хосеп Гвардиола жамоасини тарк этишини эълон қилиши мумкин. Бу ҳақда Испаниянинг Sport нашри хабар бермоқда.
Эслатиб ўтамиз, бугун Гюндоган ўзининг учинчи Чемпионлар лигаси финалида иштирок этади. Немис ярим ҳимоячиси энг нуфузли еврокубокларнинг олдинги ҳал қилувчи ўйинларида мағлуб бўлганди. Истанбулдаги финалда “Манчестер Сити” Миланнинг “Интер”ига қарши майдонга тушади. Ушбу ўйиндан сўнг Гюндоган эркин агент сифатида жамоасидан кетишини эълон қилиши мумкин.
Илкайнинг трансфери учун асосий фаворит ҳозир "Барселона" бўлиб турибди, у немисга уч йиллик шартнома таклиф қилмоқда.
