Ўзбекистон терма жамоаси сафарда жуда муҳим ғалабага эришди ва саралаш босқичида бурилиш ясай олди!

Биринчи бўлим
Қатарликлар ўйин бошидан таваккалига олдинга интилишмади, улар эҳтиёткорликни унутмаган ҳолда, тўпнинг назоратига эътибор қарата бошлашди. Одатда тўп назоратини қўлга олган жамоа қисқа паслар билан жарима майдончасига яқинлашиб келишни мақсад қилади, аммо Қатар термаси бундай қилмади. Улар майдон марказидан туриб, тўпни жарима майдончамиз ичига ва атрофига узата бошлашди. Бундан мақсад тушунарли — тўп йўқотиладиган бўлса ҳам, ўзбекистонликларнинг тезкор қарши ҳужуми олдини олиш мумкин. Бир сўз билан айтганда, рақибнинг ҳимояда хато қилишига умид қилинган ва эҳтиёткор тактика.

Санжар Турсунов ўйиннинг 13-дақиқасида ҳисобни очди!  Ўзбекистон терма жамоаси ҳимоячиси Акмал Шораҳмедов ўнг қанотдан етказиб берилган тўпни Санжар Турсунов ерга туширмаган ҳолда дарвозага йўллади. "Алания" ярим ҳимоячиси кетма-кет 4та ўйиндан бери терма жамоа сафида гол уриб келмоқда! У Кувайт, Жанубий Корея, БАА ва мана бугун Қатар терма жамоаси дарвозасини ишғол қилди!

Ана энди Қатар таваккал қилишга мажбур эди. Терма жамоамизда эса ҳеч нарсани ўзгартириш шарт эмас. Тартибли ўйин, тўп назорати, қарши ҳужум — ғалаба учун омил бўлиб хизмат қилиши керак эди.

Кейинги вазиятларда рақиблар бир мартадан дарвозаларга олис масофадан зарба йўллаб кўришди. Лоренснинг зарбасини Нестеров қайтарган бўлса, Турсуновнинг зарбасига аниқлик етишмади.

Ўйиннинг 21-дақиқасида Себастян Сория ўз дарвозасини ишғол қилиб қўйишига сал қолди. Рақиблар жарима майдончаси атрофида Улуғбек Бақоевни чалиб йиқитишди. Жепаров жарима зарбасини тўппа-тўғри дарвозага йўллаганди. Ҳимояга ёрдамга етиб келган уругвайлик футболчи бош билан тўп йўналишини ўзгартиришда бироз қалтис ҳаракат қилди. Дарвоқе, Бақоев ўнг қанот чизиғига яқин жойда тўпни эгаллаб олиб, 3-4 нафар футболчини алдаб ўтиб, мазкур жарима зарбасини ишлаганди. Умуман, ўйин давомида футболчиларимиз нафақат тактик ва техник жиҳатдан, балки индивидуал томонлама ҳам яхшироқ ўйнай бошлашди.

Ушбу учрашув комиссари комиссарлик Саликин бин Саркавийнинг талабига кўра, бўлимлар ўртасида томоқ хўллаб олиш учун бир дақиқалик танаффус берилди.

Ушбу танаффусдан кейин ўйин темпи бироз тушди. Жамоалар яна пайт ва имкон қидира бошлашди. Тўпни назорат қилиш бўйича фоиз кўрсаткичи эса бизнинг фойдамизга ошиб борди.

Биринчи бўлим охирларида қатарликлар ўз услубларида ҳужум ташкил қилишди. Жамоа сардори чап қанотда бир футболчимиздан қочиб кетди ва қисқа пасларга асосланган ҳужумга асос солди. Якуний зарбани Талал ал-Блуший берди. Нестеров тўпни ишонч билан эгаллаб олди.

Биринчи бўлимга қўшиб берилган дақиқаларнинг иккинчисида Игнатий Нестеров бизни голдан қутқариб қолди. Дарвозадан анча олис масофадан мезбонлар жарима зарбасини қўлга киритишди. Халфан Иброҳим узатиб берган тўпни Весам Ризиқ бош билан дарвозага йўллади. Тўп тўппа-тўғри дарвозанинг олис юқори бурчагига йўл олаётганида Игнатий тўпни ён томонга уриб юборишга муваффақ бўлди.

Биринчи бўлимни ғолиб сифатида тарк этиш муҳим аҳамиятга эга. Биз бу ишни Жанубий Корея билан ўйинда эплай олмагандик. Бу сафар эса Нестеров бизни голдан қутқарди.

Иккинчи бўлим

Иккинчи 45 дақиқаликда жамоамиз мураббий томонидан берилган кўрсатмани янада ишонч билан бажаришди ва тўпни ўз оёқларида сақлаб тура олишди. Деярли Қатарга ўйнаш имконини бермади.

55-дақиқада Жепаров 2-3 нафар ҳимоячи орасидан чиройли тарзда ўтиб кетди ва жарима майдончаси яқинига келиб, тўпни ўз ёнида очилган Кападзега узатди, Темур уни ўнг қанотдан жарима майдончасига кириб бораётган Турсуновга етказди. Санжар тўпни дарвозабон майдончасига узатганда эса ҳимоячилардан бирига тегиб дарвозага йўл олаётганида дарвозабон тўпни эгаллаб олди.

73-дақиқада Санжар Турсунов акробатик услубда гол уришга ҳаракат қилиб кўрди. Бу сафар Акмал Шораҳмедов тўпни жарима майдончаси ичида турган Санжарга тўпни юмшоқ тарзда етказди. Турсуновнинг зарбаси эса дарвоза устуни ёнидан ўтиб кетди.

Ўйиннинг 75-дақиқасида жуда чарчаган Гадоев ўрнига Виталий Денисовни майдонга туширди. "Днепр" футболчисининг майдонга туширилиши чап қанотимизни кучайтирди. 78-дақиқада терма жамоамизнинг яна бир ҳужуми Турсуновнинг зарбаси билан якунланди. Бу сафар тўп йўлига ҳимоячилар ғов бўлишди. Орадан 3 дақиқа ўтиб, энди Санжарнинг пасини Жепаров майдончасига тўпни тўхтатиб қола олмади. Ўша дақиқанинг ўзида футболчилармиз Ҳасан ал-Ҳайдосга зарба йўллаш имконини бериб қўйишди. Бахтимизга унинг зарбаси бироз ноаниқ бўлди.

Қувонарли томони, ҳакам томонидан иккинчи бўлимга қўшиб берилган 4 дақиқа ичида ҳам терма жамоамиз тўпни яхши назорат қилишди ва ҳужум уюштиришди. Дарвоқе, ана шу дақиқаларда "араблар кушандаси" ҳисобланган Гейнрих ўйин вақтини жуда чиройли тарзда чўзиб берди!

Ўзбекистон ЖЧ-2014 саралашидаги илк ғалабасига эришди ва Эрон-Жанубий Корея ўйини олдидан 2-ўринга кўтарилиб олди! Баракалла йигитлар, "молодцы" футболчилар!

Ғалаба муборак, азиз дўстлар! Мундиал тобора яқинлашмоқда!

ЖЧ-2014 саралаш баҳси. 4-босқич. 5-тур.
ҚАТАР - ЎЗБЕКИСТОН - 0:1 (0:1)
Гол: Санжар Турсунов (13)
Огоҳлантиришлар: Лоренс (42), Талал ал-Блуший (86) — Жасур Ҳасанов (45+2), Анзур Исмоилов (84), Виталий Денисов (89)
Қатар: 1. Қосим Бурҳон, 3. Муҳаммад Касола, 4. Лоренс (Ҳасан ал-Ҳайдос, 46), 6. Марконе Амарал, 7. Весам Ризиқ (С), 10. Халфан Иброҳим, 14. Иброҳим ал-Ғаним (Ҳамид Исмоил, 46), 15. Талал ал-Блуший, 16. Муҳаммад Разароқ (Мажид Муҳаммад 76), 19. Холид Муфтаҳ, 23. Себастян Сурия
ЎЗБЕКИСТОН: 12. Игнатий Нестеров, 23. Акмал Шораҳмедов, 20. Ислом Tўхтахўжаев, 2. Анзур Исмоилов, 22. Шоҳрух Гадоев (Виталий Денисов, 75), 6.Жасур Ҳасанов, 7.Азиз Ҳайдаров, 18. Тимур Кападзе, 17. Санжар Tурсунов (Олег Зотеев 90+2), 8.Сервер Жепаров (С), 10.Улуғбек Бақоев (Александр Гейнрих 87).
Бош ҳакам: Тан Хай (Хитой)