Эрон ва Жанубий Корея терма жамоалари эртасидаги ўйинни барчамиз кутдик ва бу ўйинни ҳам катта қизиқиш билан кузатдик.

Бутун ўйин давомида Жанубий Корея катта ташаббусга эришди. Ҳаттоки биринчи бўлимда улар 2 марта Эрон дарвозасининг тўсинини нишонга олишди.

Иккинчи бўлимнинг 55-дақиқасида тажрибали Масъуд Шожаий иккинчи сариқ карточкани олиб, майдонни тарк этди. Бир киши кам бўлиб қолганига қарамай, майдон эгалари жасорат кўрсатишди ва 75-дақиқада Жавод Некунамнинг зарбаси эвазига ҳисобни очишга муваффақ бўлишди. Ушбу гол стандарт вазият маҳсули бўлди.

Негадир кореяликлар ўйини тезкорлик кўзга ташланмади. Улар сон жиҳатдан устун бўлган ҳужумларда ҳам сусткашликка йўл қўйишди. Бундан ташқари, улар томонидан уюштирилган бир хил кўринишдаги ҳужумлар мезбон ҳимоячилари томонидан бартараф этиб турилди.

Эроннинг ушбу ғалабасидан кейин "А" гуруҳидаги вазият янада чигаллашди. Энди Жанубий Корея ва Эронда 7 очкодан мавжуд бўлса, Ўзбекистон 5 очко билан 3-ўринни эгаллаб турибди.

Энди 14 ноябрь куни Эрон ўз майдонида Ўзбекистонни қабул қилса, Жанубий Корея дам олади. Қатар эса ўша куни Ливанни қабул қилади.

ЖЧ-2012. 4-БОСҚИЧ. "А" ГУРУҲИ
ЭРОН - ЖАНУБИЙ КОРЕЯ - 1:0 (0:0)
Гол: Жавод Некунам (75)
Четлатиш: Масъуд Шожаий (56), Карлос Кейруш (75, Эрон бош мураббийи)
Эрон: Маҳди Раҳматий, Хусро Ҳайдарий, Жалол Ҳуссайний, Жавод Некунам (С), Масъуд Шожаий, Адраник Теймурян (Мазяр Заре 87), Пежман Мунтазарий, Ризо Ғучаннажод Нурниа (Муҳаммад Ризо Халатбарий 69), Муҳаммад Нурий, Ашкан Дежага, Меҳрдод Пўлодий (Ҳусайн Маҳиний 62)
Жанубий Корея: Чжунг Сунг Рёнг, Чжунг Ин Вхан, Квак Тэ Хви, Ким Бо Кюк, Парк Чу Йонг, Ли Кун Хо (Ли Чун Йонг 66), Парк Йонг Ву, Ох Беом Сеок, Ки Сунг Йеунг, Ким Шин Вук, Юн Сук Йонг.
Бош ҳакам: Абдул Малик (Сингапур)

A - Гуруҳи