Лондоннинг "Тоттенхэм"и ва Туриннинг "Ювентус" клублари сўнгги бир ярим йил давомида "шпорлар"да ижара асосида тўп тепган ҳужумчи Деян Кулушевскининг нархи борасида келиша олмаяпти. Олдинроқ инглиз жамоаси "кекса сеньора"га футболчи учун аввал келишилган 35 миллион еврога сотиб олиш ниятида эмаслигини айтганди.
Бироқ, журналист Николо Скиранинг хабар беришича, "Тоттенхэм" ҳали ҳам Кулушевскини фақат ўз шартлари билан олиб қолишга тайёр. "Шпорлар" футболчи учун максимал 20 миллион евро тўлашга тайёр, "Ювентус" эса камида 30 миллионни талаб қилмоқда. Клублар ўртасидаги музокаралар давом этмоқда. "Бьянконерилар"нинг спорт директори Жованни Манна Лондонда бўлиб, у ерда "Тоттенхэм" вакиллари билан шартномани шахсан муҳокама қилмоқда.
