Кеча Осиё қитъасида ЖЧ саралаш босқичининг бир нечта ўйинлари бўлиб ўтди. Жумладан, Ўзбекистон терма жамоаси билан бир гуруҳдан ўрин олган Жанубий Корея терма жамоаси Эронда меҳмон бўлди. Ушбу ўйинда майдон эгалари 1:0 хисобида ғалаба қозонишди. Бу ўйиндаги мағлубият Корея матбуотида бир қанча танқидий мақолаларни келтириб чиқарди. Нуфузли «Спортс Чосон» нашри шундай ёзади:

«Терма жамоамиз шу пайтгача ҳеч қачон Теҳрондан ғалаба билан қайтмаган экан. Шу пайтгача 4 марта сафар қилган бўлсак, 2 мағлубият ва 2 дурангга эришганмиз, холос. Бош мураббий Чой Канг Хи ўйиндан олдин янги тарих яратишга ваъда берганди. Аммо мезбонлар бизни «кўмиб ташлашди». Шу куни гуруҳдаги нариги ўйинда Ўзбекистон сафарда Қатарни мағлуб этди ва 1, 2-ўринлар учун даъвогарлар сафига қўшилди. Чой Канг Хининг йўли торайиб қолди. Ўтган ойда Ўзбекистон билан ўйинда бурчак тўплари бизга анча хавф солган бўлса, бу сафар Эрон бизни эркин зарбалар билан жазолашга уриниб кўрди. Бош мураббийимиз ҳужумда бўйдор ва кучли Ким Шин Вукни ўйнатди. Айтиш мумкинки, 100 минг томошабинга мўлжалланган «Озодий» ўйингоҳи денгиз сатҳидан 1273 метр баландликда жойлашган ва бу ҳам катта таъсир кўрсатди. Иккинчи бўлимнинг ярмидан бошлаб эса Эрон ижросидаги Голливуд экшнларида ҳам учрамайдиган томошаларга гувох бўлдик. Қўпол ўйинлари билан эронликлар футболни жанг спортига айлантириб юборишди. Иккинчи бўлимнинг 30-дақиқасида Некунам томонидан гол киритилгач эса вақтни чўзишни бошлашди. Умуман олганда, ифлос футболга мағлуб бўлдик».

Яна бир нашр «Daily Sports» эса: «Чой Канг Хи Ўзбекистон билан ўйинда гол киритган бўлса-да таркибдан четлатган Ли Донг Гук Кей-лигада голлар уришда давом этмоқда. У 17 октябр куни «Улсан» – «Чонбук» ўйинида гол урди! Тақдирнинг ҳазилини қарангки, Эрон билан ўйинда ҳужумчиларимиз ҳеч нарса қилолмаётган бир пайтда қария Ли Донг Гук Кей-лигада гол урмоқда!», дея пичинг қилган.

Отабек Йўлдошев, Жанубий Корея, Сеул