Тошкентнинг «Бунёдкор» ҳамда Жанубий Кореянинг «Ульсан Хёндэ» клублари ўртасидаги Осиё Чемпионлар лигаси ярим финал дастлабки учрашувини амирлик ҳакамлар бригадаси бошқариб боради.

24 октябрь, чоршанба куни Тошкентнинг «Бунёдкор» клуби Осиё Чемпионлар лигаси ярим финал дастлабки ўйинлари доирасида Жанубий Кореянинг «Ульсан Хёндэ» жамоасини қабул қилади. Тошкентда бўлиб ўтадиган ўйинни Али Ҳамад ал-Бадвавий бошчилигидаги Амирлик ҳакамлар бригадаси бошқариб боради.

Унга қанотларда Солиҳ Муҳаммад ал-Марзуқий ва Умар Сулаймон ал-Ҳумоудий ёрдам берса, Абдулла Ҳасан Муҳаммад тўртинчи ҳакам сифатида кўрсатилган.

Али Ҳамад ал-Бадвавий 2012 йилги мавсумда «Бунёдкор» иштирокидаги битта учрашувда ҳакамлик қилган. Гуруҳ босқичи 2-тур ўйинлари доирасида Жанубий Кореяда бўлиб ўтган «Поханг Стилерз»га қарши ўйинда Миржалол Қосимов шогирдлари 2:0 ҳисобида ғалаба қозонишган.

Бундан ташқари, Бадвавий Чемпионлар Лигаси гуруҳ босқичида яна учта ўйинда («Брисбэн Роар» – «Бейжинг Гуоан» 1:1, «Сёнгнам Ильва» – «Нагоя Грэмпус» 1:1, «Кашива Рэйсол» – «Гуангчжоу Эвергранд» 0:0) ҳакамлик қилган бўлиб, уларнинг бирортаси майдон эгалари ғалаба қозонишмаган.

Эслатиб ўтамиз, «Бунёдкор» ва «Ульсан Хёндэ» жамоалари ўртасидаги жавоб учрашуви 31 октябрь куни Жанубий Кореяда бўлиб ўтади.