Япония ўсмирлар терма жамоаси бош мураббийи Йоширо Морияма U17 Осиё кубоги 1-тури доирасида Ўзбекистонга қарши бўлиб ўтган ўйин (1:1) борасида ўз фикрлари билан ўртоқлашди.

"Қийин ўйин бўлишини билардик. Чунки аввал ҳам бу жамоа билан ўйнаганмиз. Биринчи бўлиб гол уриб олдик. Яна битта гол ура олмаганимиздан кейин шундай якунни кутиш мумкин эди. Ўзбекистон ҳақиқатан ҳам кучли жамоа. Гуруҳ босқичида яна иккита ўйинимиз бор. Якунда эса гуруҳ ғолиби бўлишни истаймиз", — дидеи Морияма.

Шунингдек, Ўзбекистон дарвозасига гол урган Ютака Мичиваки ҳам ўз фикрини билдириб ўтди.

"Ўйиндан гўёки биз ютқазгандек таассурот қолдирди. Аслида эса бир очкони қўлга киритдик. Шунинг учун хафа бўлишимиз керак эмас. Ҳаво кутилганидан иссиқ бўлди. Шунинг учун кейинги ўйинлар олдидан бунинг чорасини кўриш керак. Кўпроқ сув ичган ҳолда, уни танада сақлаб қолиш керак бўлади", — деди Мичиваки.