Ўзбекистон ўсмирлар терма жамоаси бош мураббийи Жамолиддин Раҳматуллаев U17 Осиё кубоги гуруҳ босқичи 1-тури доирасида бўлиб ўтган Японияга қарши ўйин борасида ўз фикрини билдириб ўтди.

"Ўйинни жуда яхши бошладик. Аммо гол ўтказиб юборганимиздан кейин шогирдларим тезроқ ҳисобни тенглаштириш мақсадида шошилишди. Афсуски, биринчи бўлимда ўз имкониятларимиздан фойдалана олмадик. Ўйин сўнгида эса гол уриб, дурангга эришдик. Энди эса бор эътиборимизни Ҳиндистонга қарши учрашувга қаратамиз.

Ўйин давомида эҳтирослар юқори даражада бўлди. Ғалаба қозонишимиз мумкинлигига ишонган ҳолда ҳаракат қилдик. Якунда эса дуранг билан кифояландик. Япония жисмоний жиҳатдан кучли бўлса-да, биз охиригача курашдик. Кейинги ўйинда кўпроқ гол уришимиз керак. Буни тушуниб турибман", — деди Жамолиддин Раҳматуллаев.

Шунингдек, Япония дарвозасига гол урган Амирбек Саидов ҳам фикрлари билан ўртоқлашди:

"Ғалабага умид қилгандик, аммо дуранг билан чекландик. Шунга қарамай,, ўз мақсадимизга эришдик. Дурангдан қониқиш ҳосил қилдик. Ҳиндистонга қарши ўйинда эса ғалаба қозониш учун қўлдан келган барча ишни қиламиз", — деди Саидов.