O‘zbekiston o‘smirlar terma jamoasi bosh murabbiyi Jamoliddin Rahmatullayev U17 Osiyo kubogi guruh bosqichi 1-turi doirasida bo‘lib o‘tgan Yaponiyaga qarshi o‘yin borasida o‘z fikrini bildirib o‘tdi.

"O‘yinni juda yaxshi boshladik. Ammo gol o‘tkazib yuborganimizdan keyin shogirdlarim tezroq hisobni tenglashtirish maqsadida shoshilishdi. Afsuski, birinchi bo‘limda o‘z imkoniyatlarimizdan foydalana olmadik. O‘yin so‘ngida esa gol urib, durangga erishdik. Endi esa bor e’tiborimizni Hindistonga qarshi uchrashuvga qaratamiz.

O‘yin davomida ehtiroslar yuqori darajada bo‘ldi. G‘alaba qozonishimiz mumkinligiga ishongan holda harakat qildik. Yakunda esa durang bilan kifoyalandik. Yaponiya jismoniy jihatdan kuchli bo‘lsa-da, biz oxirigacha kurashdik. Keyingi o‘yinda ko‘proq gol urishimiz kerak. Buni tushunib turibman", — dedi Jamoliddin Rahmatullayev.

Shuningdek, Yaponiya darvozasiga gol urgan Amirbek Saidov ham fikrlari bilan o‘rtoqlashdi:

"G‘alabaga umid qilgandik, ammo durang bilan cheklandik. Shunga qaramay,, o‘z maqsadimizga erishdik. Durangdan qoniqish hosil qildik. Hindistonga qarshi o‘yinda esa g‘alaba qozonish uchun qo‘ldan kelgan barcha ishni qilamiz", — dedi Saidov.