Карло Анчелоттининг ўғли Давиде Анчелотти Бразилия термасини вақтинча бошқариб туриши мумкин.
Бразилия футбол конфедерацияси (CBF) "Реал Мадрид" бош мураббийини мамлакат терма жамоасига тайинлаш имкониятларига оптимистик қарамоқда.
Ҳозир Бразилия терма жамоаси вақтинчалик бош мураббийи Рамон Менезеснинг мураббийлар штабига Анчелоттига яқин бўлган шахсни киритиш, Карлонинг ўзи эса 2024 йилда мадридликлар билан шартнома муддати тугаганидан кейин жамоага қўшилиши варианти кўриб чиқилмоқда.
ESPN Brasil хабарига кўра, бундай шахс 2016 йилдан буён отасининг ёрдамчиси бўлиб ишлаб келаётган Давиде Анчелотти бўлиши мумкин.
33 ёшли италиялик 2023/24 йилги мавсумда Бразилия терма жамоасига ўйинчиларни чақиришда ҳам иштирок этиши кутилмоқда. Барча тафсилотлар томонларнинг июнь ойи охирида бўлиб ўтадиган учрашувида муҳокама қилинади.
CBF терма жамоага тайинланишидан анча олдин мураббийлар штабида ишончли одамнинг бўлиши Карлонинг мослашишига ёрдам беради, деб ҳисоблайди.
