Ўрта Шарқнинг энг йирик мамлакати бўлган Саудия Арабистони футболга сармоя кирита бошлади. Араблар ўз лигасини дунёдаги энг яхши мусобақалардан бирига айлантириш учун катта пул сарфлашмоқда. Бу йўлдаги илк қадам Криштиану Роналдуни олиб келиниши бўлди. У ўтган январь ойида "МЮ"дан кетиб, "Ал-Наср" сафига бориб қўшилган эди. Унга яқиндагина Карим Бензема ҳам шерик бӯлди. У "Реал"даги янги шартномани рад этиб, "Ал-Иттиҳод"га келишни афзал кўрганди. Агарда собиқ "қироллик клуби"нинг вакилларини бир рамзий терма жамоага киритсак, улар қўрқинчли кўриниш олади.
Роналду ва Бензема ортидан тез орада яна бир нечта номлар келиши кутилмоқда. Шулардан бири "Манчестер Сити" юлдузи Бернарду Силвадир. Португалия терма жамоаси аъзосига номи очиқланмаган араб жамоаси томонидан йирик шартнома таклиф этилган. 28 ёшли ярим ҳимоячи "шаҳарликлар" билан требл қайд этган эди. Силва Форс кўрфаси давлатига кетиши мумкин бўлган ягона АПЛ футболчиси эмас. "Челси" жуфтлиги бўлмиш Каллум Хадсон-Одои ва Хаким Зиешлар ҳам Саудиядан таклифларга эга. Хусусан, Зиешнинг "Ал-Наср"га ўтиши деярли аниқ бўлиб улгурган.
Агарда евроюлдузлардан тузилган рамзий терма жамоага назар солсангиз, у ерда ажойиб футболчилар жамланганини кўрасиз. Масалан, ярим ҳимояда яна бир "Челси" вакили Н'Голо Канте бўлади. У шу ҳафтада Бензема ортидан "Ал-Иттиҳод"га олиб келинди. Аслида у "Челси" билан янги шартномага имзо чекиши керак эди.
Кантега ярим ҳимояда "Вулверхэмптон" сардори Рубен Невеш шерик бўлади. У яқиндагина "Ал-Ҳилол"га 47 миллион фунт эвазига сотиб юборилди. Ҳимояда сиз бошқа бир "Челси" юлдузини кўришингиз мумкин: Калиду Кулибали "Ал-Ҳилол" билан шартномага яқин турибди.
Кулибали билан ҳамкорликда ҳимояда бошқа юлдузлар ҳам бўлади. Улардан бири ҳозирда эркин агент бўлган Мэтт Доэртидир. Ҳимоячи "Атлетико"дан кетганидан бери жамоасиз юрганди. Шунингдек, Саудияга "Эвертон"дан кетган Йери Мина ҳам йўл олади. У ҳам ҳимоядан жой олиши белгиланган. Ваниҳоят, юлдузли терма жамоа дарвозасида Сенегал терма жамоаси аъзоси Эдуар Менди туради. "Челси"дан кетиши кутилаётган футболчи "Ал-Аҳли" билан узоқ йиллик шартнома тузиши айтилган. Юқоридаги расмда айнан мана шу футболчилар тактик схемада акс эттирилди.
ИСМАТОВ Ж.
