Ўзбекистон ўсмирлар терма жамоаси бош мураббийи Жамолиддин Раҳматуллаев U17 Осиё кубоги чорак финал босқичи доирасида бўлиб ўтадиган Саудия Арабистонига қарши ўйин олдидан ўз фикрлари билан ўртоқлашди.

"Саудия Арабистони — жуда яхши рақиб. Бу жамоа гуруҳ босқичининг 3та ўйинида ғалаба қозонди. Ҳали ўз дарвозасидан гол ўтказиб юбормади. Саудия Арабистони — бизга бегона эмас. Бу жамоа билан иккита ўртоқлик учрашувини ўтказганмиз. Кўпроқ техникага таянадиган, тактик томондан ҳам яхши футбол ўйнайдиган жамоа. Бу рақиб ўйинларини ўрганяпмиз. Уларнинг ҳам ўзига яраша камчилиги бор. Худо хоҳласа, уларга қарши майдонга чиқиб, ғалаба қозонамиз. Бу томондан кўнглим тўқ.

Тўғри таъкидлаб ўтдингиз, ҳар бир учрашувда кўп голли вазиятларни юзага келтиряпмиз. Аслида бунинг ўзи ҳам яхши ҳолат. Аммо вазиятлардан фойдаланишда оқсаяпмиз. Буни билиб турибмиз. Бунинг устида ишлаяпмиз. Олдимизда турган ўйинда бу муаммони бартараф этиб, ҳар бир вазиятни голга айлантиришга ҳаракат қиламиз", — деди Раҳматуллаев.