Эртага "Бунёдкор" пойтахтимиздаги "Жар" стадионида Кореянинг "Ульсан Хёндэ" клубини қабул қилади. Бугун эса жамоалар бош мураббийлари ва бир нафардан футболчилари иштирокида матбуот анжумани ўтказилди. Матбуот анжуманининг дастлабки қисмида меҳмонлар вакиллари иштирок этишди.

Ким Хо Гон ("Ульсан Хёндэ" клуби бош мураббийи):
Эртанги ўйин муҳим аҳамиятга эга. Боиси, жамоалар ОЧЛ финали учун кураш олиб боришади. "Бунёдкор" кучли жамоа. Бу жамоа сафида миллий терма жамоага аъзо бўлган бир нечта футболчилар тўп суради. Бу ўйин ҳар иккала жамоа учун муҳим ва биз эртага чиройли ўйин гувоҳи бўлишимиз мумкин.

— Ихтиёрингиздаги барча футболчи эртанги ўйинга тайёрми? Жамоанинг бир қисми бу ерга узоқ парвоз орқали етиб келишган бўлса, терма жамоа аъзолари Эронда етиб келишди. 
— Ҳа, ҳамма ўйинга тайёр. Миллий терма жамоа футболчилари бу ерга Эрондан учиб келишди. Шунга қарамай, футболчиларимнинг жисмоний ҳолати яхши. Эртанги ўйинга тайёрмиз.

— "Бунёдкор" сафида қайси футболчини хавфли ўйинчи деб ҳисоблайсиз?
— "Бунёдкор"да жамоавий ўйин яхши шаклланган. Жамоа ҳимояси ва ярим ҳимояси ўртасидаги боғлиқлик яхши йўлга қўйилган. Шунга қарамай, 19-рақамдаги Жасур Ҳасанов тез ва чаққон. Шунингдек, 16-рақамдаги ҳимоячи Артём Филипосян ва 13-рақамдаги ярим ҳимоячи Лутфулла Тўраевни таъкидлаб ўтишим мумкин.

— Эртага сизларни дуранг натижа ҳам қаноатлантирадими?
— Аввал ҳам таъкидлаганман, меҳмондаги ўйин қийин кечади. Шунга қарамай, биз фақат ғалаба учун майдонга  тушамиз. Буни ўйинимиздан ҳам кўришингиз мумкин. Биз эртага агрессив ва ҳужумкор ўйин кўрсатамиз.

— Эрон билан ўйинда терма жамоа футболчилари муваффақиятсиз ўйин кўрсатишди. Бу ҳолат "Бунёдкор" билан ўйинда салбий таъсир кўрсатмайдими?
— Терма жамоамиз Эронга ютқазган бўлса-да, Корея жуда яхши ўйин кўрсатди. Мағлубиятга қарамай, терма жамоа гуруҳда 1-ўринни эгаллаган ва ЖЧга чиқиш учун яхши имкониятга эга. Футболчиларда ҳеч қандай босим йўқ. Улар эртанги ўйинга тайёр.

— "Ульсан" анча вақтдан бери энг яхши ўйинчиларини тўплай олмаётган эди. Ҳозир эса жамоада барча футболчилар тўпланган. Бу ҳолат жамоага қўшимча куч берадими. Мураббий сифатида ўзингизни қандай ҳис қиляпсиз?
— Бу яхши. Ушбу мавсум клубимиз учун анча оғир ўтмоқда. Чунки Кей-лига формати ўзгаргани сабабли Корея жамоалари кўп ўйин ўтказишмоқда. Аммо бунга қарамасдан, бугун таркибимизда энг кучли футболчилар тўпланишган ва улар эртанги ўйинга тайёр.