“Жаҳон” АА — Тошкентдаги дипломатия корпуси вакиллари мамлакатимиз пойтахтида барпо этилган янги “Бунёдкор” стадионида бўлишиб, у ерда ёш ва профессионал футболчилар учун яратилган шароитлар билан танишдилар.

Хорижлик дипломатлар, шунингдек, матбуот анжуманлари ўтказиладиган зални, ўзбек футболи тарихи музейини кўздан кечирганлари баробарида “Бунёдкор” стадиони ҳузуридаги болалар ва ўсмирлар футбол мактабида ҳам бўлдилар.

“Жаҳон” ахборот агентлигининг мухбири билан бўлиб ўтган суҳбат чоғида Хитой Халқ Республикасининг Ўзбекистондаги Фавқулодда ва Мухтор элчиси Чжан Сяо янги спорт мажмуаси дарҳақиқат гўзал ва маҳобатли эканлигини қайд этди.

— Бу ерда ўрнатилган жиҳоз ва ускуналарнинг барчаси халқаро меъёрларга жавоб беради, — деди у. — “Бунёдкор” спорт мажмуаси Президент Ислом Каримовнинг ташаббусига кўра қурилган бўлиб, янги иншоот Ўзбекистонда спортнинг ривожланишига кўрсатилаётган улкан эътибордан далолат беради. Буларнинг барчаси мамлакатингизда баркамол авлодни тарбиялашга қаратилган изчил ислоҳотлар амалга оширилаётганининг тасдиғи ҳамдир. Ҳозирги вақтда Ўзбекистон спортнинг кўплаб турлари бўйича Осиё қитъасида етакчи ўринни эгаллагани ҳолда турли халқаро мусобақаларда юқори натижаларни қўлга киритиб келмоқда. Фурсатдан фойдаланиб, ўзбекистонлик футбол мухлисларини ногирон-ампулантлар ўртасидаги жаҳон чемпионати ва ўсмирлар ўртасида ўтказилган Осиё чемпионатида эришилган ғалабалар билан чин қалбимдан табриклайман.

Буюк Британия ва Шимолий Ирландия Бирлашган қироллигининг мамакатимиздаги Фавқулодда ва мухтор элчиси Жорж Эдгар эътироф этганидек, хорижлик дипломатлар қисқа муддат ичида халқаро талаблар даражасида бунёд этилган “Бунёдкор” стадиони спорт соҳасида Ўзбекистон эришган улкан муваффақиятларнинг тимсоли эканлигига ишонч ҳосил қилдилар. Унинг айтишича, мазкур иншоот ўзининг миқёси ва маҳобати билан инсонни ҳайратда қолдиради, янги спорт мажмуасида футболчилар учун яратилган шарт-шароитлар эса алоҳида эътиборга моликдир.

— Дунёнинг энг машҳур стадионларидан асло қолишмайдиган ушбу ажойиб мажмуа билан танишар эканмиз, Ўзбекистон халқи қисқа муддатда мазкур бетакрор спорт мажмуасини бунёд этган инсонлардан фахрланганини ҳис этдик, — деди британиялик дипломат. — Мамлакатингиз Президенти ташаббуси билан қурилган бу каби спорт иншоотлари ўзбек футболининг жаҳон миқёсида ривож топишида муҳим ўрин тутмоқда.

Россия Федерациясининг Ўзбекистон Республикасидаги Савдо-сотиқ бўйича ваколатхонаси раҳбари Константин Артюшин замонавий спорт мажмуасида яратилган шарт-шароитларни юқори баҳолар экан, ҳадемай ушбу янги стадион халқаро даражадаги футбол беллашувлари ўтказиладиган майдонга айланишига тилакдош эканлигини маълум қилди.

— Ўзбек футболи жадал ривожланмоқда, бу эса давлатнинг спортни ривожлантиришга катта эътибор қаратаётганидан далолат беради, — К. Артюшин. — Махачқалъанинг “Анжи” жамоасидаги ўйинлари билан барчанинг эътиборига тушган ўзбек футболчиси Одил Аҳмедов Россия премьер-лигасининг энг машҳур вакиллларидан бири саналади. ФИФА ҳаками Равшан Эрматов ҳам Россияда катта нуфузга эгадир.