Германия терма жамоаси раҳбарияти ўз уйида бўлиб ўтадиган Европа чемпионати бошланишига бир йил қолганида мураббийни алмаштириш ҳақида ўйламоқда. Sport Bild хабарига кўра, "Бундестим" "Бавария"нинг яна бир собиқ устози Юлиан Нагельсманн Ханс-Дитер Фликнинг ўрнига ягона муносиб номзод деб ҳисобламоқда.

Манбага кўра, Германия терма жамоаси раҳбарларининг бир қисми вақтни бой бермасликка ва Нагельсманн ишсиз бўлган вақтда уни таклиф қилишга чақирмоқда. Бошқа қисми Юлианнинг етарлича тажриба ва ваколатга эга эканлигига шубҳа қилади.

Эслатиб ўтамиз, Флик бошчилигидаги Германия терма жамоаси сўнгги учта ўртоқлик учрашувининг бирортасида ҳам ғалаба қозона олмади. Шунингдек, жамоа Қатарда бўлиб ўтган жаҳон чемпионатида гуруҳ босқичида иштирокини якунлаганди.