"Манчестер Сити" ёзги трансферлар ойнасида Деклан Райсни сотиб олмоқчи эди. Аммо 90 миллион фунтлик таклифи рад этилгач, пойгадан чиқди. Бу эса "Арсенал"га йўл олчиб берди. Ҳозир тўпчилар "Вест Хэм" билан ярим ҳимоячи борасида 105 миллион фунтлик келишувга эришди. Ҳа, бунга эришилди. Аммо "шаҳарликлар" қистови сабабли Райснинг нархи янада ошиб кетди. Бундай мисоллар тарихда кўп учрайди. Аввалари "МЮ" ва "Челси" ҳам "Манчестер Сити" сабабли ўз нишонларига керагидан ортиқ тўлашга мажбур бўлишган. Қуйида шу ҳақида.
Фред – 52 миллион эвазига "МЮ"
Бразилиялик футболчи 2018 йилда "Манчестер Сити"га ўтиши керак эди. "Шахтёр" ва "шаҳарликлар" ярим ҳимоячи борасида 44.5 миллион фунтлик келишувга эришади. Бироқ, "МЮ" Фредга 50 миллиондан кўпроқ таклиф қилиб, трансфер пойгасида ютиб чиқади. Шундан бери Фред 200 дан ортоқ ўйинларда "қизил иблислар" сафида майдонга тушди. Бироқ, у ўзидан кутилган натижани бера олмади.
Жоржиньо – 50 миллион эвазига "Челси"
Кўпчилик Жоржиньонинг бир пайтлар "Манчестер Сити"га ўтишга яқин келганини эсдан чиқарган бўлиши мумкин. Италия терма жамоаси аъзоси учун 2018 йилда "шаҳарликлар" 46.5 миллион фунт тўламоқчи бўлади. "Челси" эса пойгада ютқазмаслик учун "Наполи"га 50 миллион фунт таклиф қилади. Шу аснода Лондон клуби Жоржиньони Гвардиола тумшуғи остидан олиб кетади. Аммо бу бежиз эмасди. Орадан бир йил ўтиб, Гвардиола Родрини ўз жамоасига олиб келди. Ҳозир у треб-қаҳрамонлардан бири.
Харри Магуайр – 80 миллион эвазига "МЮ"
2019 йилнинг ёзида Магуайр кўпчилик клублар ўртасида талаш бўлаётган эди. Улар ичида "Манчестер Сити" ҳам бўлган. Бироқ, "шаҳарликлар" ҳимоячи эвазига 70 миллиондан ортиқ тўлай олмасди. Масалани тезроқ ҳал қилиш учун "МЮ" Магуайр учун 80 миллион фунт тўлаб беради. Айтиш мумкинки, бу пуллар деярли ҳавога учди. Магуайр эса тўрт йилдан кейин "қизил иблислар" сафини тарк этиш бўсағасида турибди.
Криштиану Роналду – 12.9 миллион эвазига "МЮ
2021 йилда Криштиану Роналду "Манчестер Юнайтед"га афсонавий қайтишни амалга оширган эди. Аммо ундан олдин собиқ "Ювентус" ҳужумчиси "Манчестер Сити" билан узоқ вақт музокаралар олиб боради. Гвардиола жамоасига Роналду таклиф этилганди. Аммо "МЮ" бу ерда ҳам тезкор ҳаракат қилиб, 13 миллион эвазига португалиялик йўлини буриб юборади. Роналду Англияга қайтганидан кейин 54 та ўйинда 27 та гол уришга эришди. Бироқ, Пирс Морган билан бўлган интервьюдан сӯнг, ҳаммаси ёмон томонга ўзгарди – Роналду "МЮ"дан қувилди.
Алексис Санчес – Мхитарян ўрнига "Арсенал"дан "МЮ"га
Алексис Санчес ва Генрих Мхитарян 2018 йилда ўзгаро алмаштирилади. Аммо чилилик ҳужумчига "Манчестер Сити" қизиқа бошлаганди. Бу эса "МЮ"ни Санчесга ўта катта, ҳафтасифа 500 минг фунт маош беришга мажбур қилади. Негаки, футболчини жамоада сақлаб қолиш керак эди. Бу миқдор "шаҳарликлар" таклиф қилган 290 минг фунтдан деярли икки баробар кўп эди. Афсуски, Санчес 20 карра чемпионлар сафида икки йил ичида 45 та ўйинда майдонга тушиб 5 та голга муаллифлик қилди холос. У 2020 йилда "Интер"га кетади.
Деклан Райс – 105 миллион эвазига "Арсенал"
Райс "Манчестер Сити" аралашгани сабабли нархи янада ошиб кетган футболчиларнинг сўнггисидир. Гвардиола жамоаси ярим ҳимоячи эвазига 90 миллион фунт таклиф қилди. Бу сўров рад этилгач, улар ўйиндан чиқди. Кўп ўтмай, "Арсенал" учинчи, 105 миллионлик таклифини жўнатди. Бу эса қабул қилинди. Шундай қилиб, "Сити" "Арсенал"ни футболчи учун қўшимча 15 миллион фунт тўлашга мажбур қилди.
ИСМАТОВ Ж.
