Маурисио Почеттино "Челси" билан мутлақо янги ҳужум чизиғини шакллантириши мумкин. Бу учун унда ҳамма нарса бор. Ўтган мавсум клуб учун рекорд даражада омадсиз ўтган эди. Шу сабаб Тодд Боэли катта тозалаш ишларини бошлаб юборган. Таркиб футболчилари ҳар ёққа, хусусан, Саудия Арабистонига ҳам йўл олмоқда. Шунга қарамай, "Стемфорд Бриж"га келаётган футболчилар ҳам бор. Уларнинг илк вакили Кристофер Нкункудир. Ҳужумчи янги мавсумдан яна бир юлдуз билан ҳаракат қилиши мумкин. Харри Кейн Нкункудан кейинги трансферга айланиши айтилмоқда. Бунга "Тоттенхэм" футболчисининг ўзи ишора қилди. Гарчанд Англия терма жамоаси аъзоси учун "Бавария" қаттиқ курашаётган бўлсада, футболчининг тақдири Лондон билан боғлиқ бўлиб қолиш эҳтимоли ҳам йўқ эмас. Аммо бу йўл "Тоттенхэм" билан ортиқ кесишмайди. 29 ёшли ҳужумчи ўзига Лондондан янги уй қурдираётганини айтган.
Айтишларича, Харри Кейн ўз оиласи билан бу уйга кўчишга яқин турибди. Уй Уентуорз Гольф клуби яқинида жойлашган. Агар шундай бўлса, Кейн "Челси" машғулотлар базаси бўлмиш "Кобхэм"дан атиги 15 мил нарида яшай бошлайди. Бу дегани, Кейн "Челси"га келиши мумкин. Агарда шундай бўлса, Почеттино жамоаси қандай кўринишга эга бўлади?
Кепа Арриcсабалага жамоада қолишни истайди. У Эдуар Мендининг кетишидан кейин, албатта асосий ўринга даъвогар саналади. Ҳимоя эса қуйидагича ташкилланади. "Брайтон"даги ажойиб мавсумдан кейин, Леви Колвилл Лондонга қайтиши кутилмоқда. У Почеттино жамоаси марказий ҳимоясида Тиагу Силва билан ҳамкорликда ҳаракат қилади. Ўнг қанотдаги ўринни сўзсиз Рис Жеймс эгаллайди. Чапда эса Марк Кукурелья ва Бен Чилвелл асосий таркиб учун рақобат қилади.
Ярим ҳимоя 107 миллионлик Энцо Фернандесга топширилади. Унга шерик сифатида "Брайтон"дан Мойсес Кайседо олиб келиниши кутилмоқда. Улар ҳамкорликда ўрин алмашиб ўйнашлари мумкин бўлади.
Почеттино учун таклиф этилаётган дастлабки тактик схема ҳужумидан Михаил Мудрик ўрин олади. У чап қанотни эгалласа, қарама-қарши томонда Нони Мадуэке шай туради. Марказий ҳужумда албатта Харри Кейндан фойдаланилади. Унинг ортидан эса Нкунку ўрин олади. Бу иккиси ўтган мавсумда жами 53 та голга муаллифлик қилганди. Кейн 33 та урган бўлса, Нкункуда 20 та Бундеслига голлари мавжуд.
Бошқа бир муқобил вариантга кўра, ҳужумда Кейн ва "Вильярреал"дан келаётган Николас Жексон бўлади. Ярим ҳимоя эса бошқа эҳтимолий трансфер бўлган Ромео Лавия ва академия вакили Итан Ампадудан ташкил топади. Ҳимояда Колвилл ўрнини яна бир талантли клуб тарбияланувчиси Бенуа Бадиашиле эгаллайди. Дарвоза соҳасида Кепа ўрнига "Интер" посбони Андре Онана пайдо бўлиши ҳам мумкин.
ИСМАТОВ Ж.
