Европа лигаси 3-тури доирасидаги Қозоннинг «Рубин» ва Бокунинг «Нефтчи» клублари ўртасидаги учрашув олдидан бўлиб ўтган матбуот анжуманида озарбайжонликлар жамоаси бош мураббийи Беюкага Гаджиевнинг россиялик журналистларга маълум қилишича, бокуликларнинг ўзбекистонлик ҳужумчиси Баҳодир Насимовга яқинда бошқа клублардан бир ярим миллион евролик таклиф тушган.
Жумладан, матбуот анжуманида журналистлар ва меҳмонлар устози ўртасидаги савол-жавоб қуйдагича бўлди:
- «Нефтчи»нинг «Рубин»дан харид қилган футболчиси Баҳодир Насимов сўнгги мавсумда Озарбайжон чемпионати тўпурари бўлди. Бу футболчи эртанги ўйинга тайёрми?
- «Нефтчи» бош мураббий сифатида энди иш бошлаганимда, Баҳодир ҳар сафар ҳам таркибдан жой олмасди. Жароҳат олишидан аввал эса, у бошқа клублардан яхши таклифлар олди. Таклиф суммаси қарийб 1 500 000 еврони ташкил этарди. У жуда яхши футболчи. Агар, «Рубин»га қарши ўйинга менда Каналес билан бирга Насимовни майдонга тушириш имконияти бўлганида, бу ҳужум тандеми олдида бирорта ҳам ҳимоя қўрғони дош беролмасди», - дейди «Нефтчи» бош мураббийи матбуот анжуманида.
Эслатиб ўтамиз, яқинда жароҳатини даволаб машғулотларни бошлаган Баҳодир Насимов 2010 йилги мавсум олдидан Самарқанднинг «Динамо» клубидан «Рубин»га бориб қўшилганди. Премьер лигадаги ярим йиллик фаолиятидан сўнг самарқандлик ҳужумчи Бокунинг «Нефтчи» клуби сафига қўшилиб, жамоаси билан мамлакат чемпиони ва чемпионат тўпурари номини қўлга киритганди.
