“Нефтчи” – “Насаф” (0:0) учрашувидан кейинги матбуот анжуманида дастлаб қаршиликлар устози ОАВ ходимлари саволларига жавоб қайтарди.

— Албатта? бугунги ўйинда ғалабага эришишимиз ҳам мумкин эди, — дея гап бошлади  “Насаф” бош мураббийи Усмон Тошев. — Иккинчи бўлимда ўйин темпи бироз пасайди. Баҳс анча асабий кечди.  Шунга қарамай, йигитлар яхши ҳаракат қилишди. Албатта сафарда “Нефтчи”га қарши ўйнаш осон эмас.  Ишлашда давом этамиз. Олдинда мавсумнинг энг муҳим ўйинлари турибди. Чемпионат доирасида ўз майдонимизда “Локомотив” ва “Динамо” билан куч синашамиз. Қолаверса кубок доирасида муҳим ўйинларимиз бор. Таркибимизда моҳир ўйинчилар тўпланган ва улар ҳар қандай рақибга қарши бемалол ҳаракат қила олишади. Тўғри, баъзида кутилмаган ҳолатлар бўлиб туради. Айниқса, бугун Шишелов бўш қолган дарвозага тўп кирита олмаган вазият каби. Умуман олганда, йигитлар кўрсатмаларимни бехато бажара олишади. Келажакка ишонч билан қараймиз. Қолган ўйинларда ғалабага эришиб, мухлисларни хурсанд этиш ниятидамиз.