"ПСЖ" ҳужумчиси Килиан Мбаппе "Реал"га ўтишга рози бўлди, дея хабар бермоқда Cadena SER нашри.
Манбага кўра, 24 ёшли франциялик футболчи Мадрид клуби билан йилига 50 миллион евро ва бонуслар эвазига беш йиллик шартнома имзолашга рози бўлган. Мбаппе агар клуб билан шартномасини 30 июлгача узайтирмаса, шу ёзда "ПСЖ"ни тарк этиши мумкин.
Олдинроқ "ПСЖ" "Ливерпул"дан Мбаппени 200 миллион еврога трансфер қилиш бўйича таклиф олгани ҳақида хабар берилганди.
Париж клуби билан ҳужумчи беш марта Франция чемпиони бўлди, уч марта мамлакат кубогини қўлга киритди ва икки мартадан мамлакат Суперкубоги ва Франция Лига кубогини қўлга киритди. У "ПСЖ" тарихидаги энг яхши тўпурар (212 та гол).
2022/23 йилги мавсумда Мбаппе парижликлар сафида барча мусобақаларда 43 та ўйинда майдонга тушиб, 41 та гол урди ва 10 та голли узатмани амалга оширди. Футболчининг клуб билан шартномаси 2024 йилнинг июнь ойи охиригача амал қилади.
