Ўзбекистон U-16 қизлар терма жамоаси 2013 йилги Осиё чемпионати саралашида Шри-Ланка, Эрон ва Ҳиндистонга қарши тўп суради.

Бош мураббий Гулнора Аъзамова қўл остида шуғулланаётган Ўзбекистон U-16 қизлар терма жамоаси 6-11 ноябрь кунлари Шри-Ланкада ташкил этиладиган 2013 йилги Осиё чемпионатига саралаш баҳсларида иштирок этади. Ўзбекистон терма жамоаси 4 ноябрь куни Тошкент – Дубай – Коломбо йўналиши бўйлаб сафарга чиқса, 11 ноябрь куни, саралаш баҳслари якунига етиши билан Тошкентга қайтади.

Гулнора Аъзамова шогирдлари саралаш босқичидаги илк учрашувни 6 ноябрь куни майдон эгалари – Шри-Ланка терма жамоасига қарши ўтказади. Икки кундан сўнг Ўзбекистон терма жамоаси Коломбодаги «City Football Complex»да Эрон қизларига қарши майдонга тушишади. Саралаш босқичидаги сўнгги ўйин 10 ноябрь куни Ҳиндистон терма жамоасига қарши бўлиб ўтади. ЎФФ Халқаро бўлими берган маълумотга кўра, Ўзбекистон U-16 қизлар терма жамоаси барча учрашувларда оқ либосларда ҳаракат қилади.

2013 йилги U-16 қизлар ўртасидаги Осиё чемпионати баҳслари келаси йилнинг ноябрь ойида бўлиб ўтади. Тўртинчи бор ташкил этилаётган мусобақанинг дастлабки тўрт иштирокчиси номи маълум бўлиб улгурган: 2011 йилги Осиё чемпионатида кучли тўртликдан ўрин олган Япония, Шимолий Корея, Жанубий Корея ва Хитой терма жамоалари мусобақанинг саралаш баҳсларидан озод қилинган. Шри-Ланкадан ташқари, Иордания, Филиппин ҳамда Гуамда бўлиб ўтадиган саралаш баҳсларида, Ўзбекистондан ташқари яна 14та терма жамоа иштирок этади. Тўрт гуруҳда дастлабки икки ўринни қўлга киритган терма жамоалар Осиё чемпионати финал босқичи йўлланмасини қўлга киритади.

Маълумот ўрнида, Ўзбекистон U-16 қизлар терма жамоаси ўз тарихида илк бор Осиё чемпионати саралаш баҳсларида иштирок этади.

Қизлар ўртасидаги U-16 Осиё чемпионати-2013, «В» саралаш гуруҳи
Ўзбекистон U-16 қизлар терма жамоаси иштирокидаги ўйинлар
6 ноябрь, сешанба, 14:30
Шри-Ланка – Ўзбекистон

8 ноябрь, пайшанба, 14:30
Ўзбекистон – Эрон

10 ноябрь, шанба, 14:30
Ҳиндистон – Ўзбекистон