19 ёшгача бўлган ёшлар ўртасидаги Осиё чемпионатида иштирок этиш учун БААга учиб кетган Ўзбекистон терма жамоаси делегацияси Дубай шаҳрига етиб борди.

Аҳмаджон Мусаев бошчилигидаги ёшлар терма жамоси ҳамда терма жамоанинг барча делегация аъзолари Дубайдаги «Etisalat» академияси базасига жойлашишган. Терма жамоа делегацияси уч кун давомида мазкур база қароргоҳида бўлади. Шундан сўнг, делегация аъзолари 1 ноябрь куни Рас Ал Хайм амирлигига қарашли «Cove Rotana» мехмонхонасига жойлашишади.

Таъкидлаб ўтиш жоиз, Рас Ал Хайм амирлиги ёшлар ўртасида (U 19) Осиё чемпионатини қабул қиладиган икки амирликдан бири ҳисобланади. Мусобақа ўйинлари шунингдек Фужайра амирлигида бўлиб ўтиши кўзда тутилган.

Рас Ал Хаймга жўнаб кетиш олдидан эса, Ўзбекистон ёшлар терма жамоаси Дубай клубларидан бирига қарши ўртоқлик учрашувини ўтказади.

Эслатиб ўтамиз, Ахмаджон Мусаев шогирдлари Осиё чемпионатидаги илк учрашувини 4 ноябрь куни Вьетнам терма жамоасига қарши ўтказади. Учрашув Тошкент вақти билан 22:00да бошланади.