«Шўртан» клуби 4-ўрин учун астойдил курашяпти. Улар иккинчи даврани жуда яхши ўтказиб келаётгандилар. Лекин футболда ғалаба билан мағлубият ёнма-ён туришини унутмаслик керак. Ғузорликлар охирги иккита турда мағлубиятга учраб, 5-ўринга тушиб қолишди. Олдинда эса жамоани «Бунёдкор», «Навбаҳор» ва «Локомотив»га қарши қийин ўйинлар кутиб турибди.
Хўш, жамоа бундай оғир вазиятдан қандай чиқиб кета олади? «Шўртан»нинг етакчи футболчиларидан бири – Фарҳод Тожиев билан “Футбол фаворит” газетаси мухбири Ш.Жўраевнинг суҳбати шу хусусида бўлди.
-«Шўртан»нинг иккита ўйинда мағлубиятга учраши мухлислар учун кутилмаган ҳол бўлди ва уларни ранжитди. Сиз бунинг сабабларини қандай изоҳлайсиз?
-Бир нарса дейиш қийин. Ўз майдонимизда «Бухоро» билан ўйинда охирги дақиқаларда тўп ўтказиб юбордик. Уйимизда ютқазиб қўйганимиз бизга анча таъсир кўрсатди. Ғузорда мағлубиятга учрамай келаётгандик. Қолаверса, иккинчи даврада ҳеч бир рақибга имкониятни бой бермаётгандик. Шунинг учун бундан ўзимиз ҳам қаттиқ ранжидик. Ўз ўйинимиздан ўзимиз қониқмадик. Гапнинг очиғи, ўша учрашувдан кейин «Металлург» билан беллашувга ишончсизлик билан қарадик. Чунки ўз кучимизга аввалгидек юқори даражада ишонмадик. Натижада биз қўрққан нарса содир бўлди. Бекободда тез гол қўйиб юборишимиз бизга ортиқча зарба бўлди. Ўйин охиригача эса йирик ҳисоб қайд этилди. Яхшиямки, орада танаффус юз берди. Бу вақт оралиғида ўзимизга келиб олишимиз учун имкон бўлади. Насиб қилса, «Бунёдкор» билан бўладиган ўйинда мухлисларимиз учун яхши натижа кўрсатамиз.
-«Шўртан» - «Бунёдкор» ўйинини қолдирилиши жамоа учун ижобий ҳолат экан-да?
-Ҳа, шундай деса бўлади. Негаки, иккита мағлубиятдан кейин футболчилар руҳий томондан ўзларини тиклаб оладилар. Ўйлайманки, бу учрашувгача ўз кучимизга бўлган ишончни қайтариб оламиз ва пухта тайёргарлик кўра оламиз.
-«Бухоро» ҳамда «Металлург»га бой берилган ўйинлардан сўнг «Шўртан» 5-ўринга тушиб қолди. Чунки «Локомотив» бундан унумли фойдаланиб, ғалабалар қозонган ҳолда очколар сонини ошириб юборди. Энди 4-ўринга қайтишга қанчалик ишоняпсиз?
-Ўйлашимча, бу йил 4-ўринни оламиз. Негаки, ўз майдонимизда «Бунёдкор»ни ютиб олсак, сафарда «Навбаҳор»ни ҳам енгишга имкониятимиз ортади. Кейин ҳаммаси Тошкентда «Локомотив» билан учрашувда ҳал бўлади. Тўғри, мағлубиятлар бизга қаттиқ таъсир қилди. Лекин ўзимизни йўқотмаслигимиз керак. Умид қиламанки, 4-ўринни қўлга киритамиз.
-Хабарингиз бор, чемпионатнинг охирги иккита тури 17 ҳамда 21 ноябрга сурилди. Бу ҳолатга муносабатингиз қандай бўлди?
-Билмадим. «Шўртан»га иккинчи даврада келиб қўшилдим. Жамоадагиларнинг барчаси билан муносабатим яхши бўлганлиги учун анча ўзимни тиклаб олдим. Мавсумнинг чўзилиши менга таъсир қилмади. Бунинг қўрқинчли жойи йўқ. Чунки бу ҳеч нарсани ҳал қилмайди. Аксинча, яна жамоадошларим билан бирга бўлиб ҳамжиҳатликда ишлаймиз. Олдин ноябрнинг охирларида ҳам ўйнаган пайтларимиз бўлган. Албатта, юзага келган танаффуснинг муддати катта. Аммо бунинг зарари йўқ.
-«Шўртан»га иккинчи даврада келиб қўшилган футболчи сифатида бу ердаги ҳаётингиздан қониқиш ҳосил қиляпсизми?
-Ўз ўйинимни кўрсатишга ҳаракат қиляпман. Чемпионатимизда танаффус бўлгани сабабли машғулотларда янада ишлаб чемпионатни яхши ҳолатда тугатмоқчиман. Тўғри, ҳозирги ҳолатим ўзимга ёқмаяпти. Чунки натижадан ҳам, ўйинимдан ҳам қониқмаяпман.
-«Шўртан»ни олдинда «Бунёдкор» ва «Локомотив»га қарши оғир ўйинлар кутмоқда. Сиз учун қайси бири алоҳида аҳамиятга эга?
-Ўйлашимча, «Локомотив»га қарши ўйин мураккаброқ ўтади. «Бунёдкор» клуби чемпионлар Лигасида меҳмонда ўйнайди. Биз билан ўйинга эса улар чарчоқ билан келишади. Бу жамоамизга қўл келиши мумкин. Бундан ташқари «Навбаҳор» билан ўйинимиз ҳам қийин ўтади. Лекин уларнинг орасида «Локомотив»га қарши учрашув энг муҳими саналади.
-Собиқ жамоангиз - «Пахтакор» чемпионликка яқин туришибди. Бу борада шубҳа қилмаяпсизми?
-Йўқ. Бу йил «Пахтакор» чемпион бўлади. Уларнинг сафида истеъдодли ёшлар жамланган. Улар чемпионликни қўлга киритишни жуда-жуда хоҳлашяпти. Шунинг учун бир жамоа бўлиб хамжиҳатликда ўйнашяпти, худди бир мушт каби! Шу боис «Пахтакор»нинг чемпион бўлишига ишонаман.
Манба: fcshurtan.uz ва "Футбол фаворит" газетаси
