Ўзбекистон U-19 ёшлар терма жамоасининг 2012 йилги Осиё чемпионати гуруҳ босқичидаги рақиби – Вьетнам ёшлар терма жамоаси Қатарга қарши ўртоқлик учрашувида 1:2 ҳисобида имкониятни бой берди.

28 октябрь куни Доҳадаги «Ал-Араби» стадионида Қатар ва Вьетнам ёшлар терма жамоалари иштирокида ўртоқлик учрашуви бўлиб ўтди. Ҳар иккала жамоа ҳам 3 ноябрь куни БААда старт оладиган 2012 йилги ёшлар ўртасидаги Осиё чемпионати баҳсларида иштирок этади. Қизиқарли ўйин майдон эгаларининг иродали ғалабаси билан якунига етди.

Қайд этиш жоиз, Вьетнам терма жамоаси Осиё чемпионати финал босқичидаги илк учрашувини айнан Ўзбекистон ёшларига қарши ўтказади. Ушбу ўйин 4 ноябрь куни Рас ал-Хайма шаҳридаги «Эмирейтс» стадионида бўлиб ўтади. Ўйин Тошкент вақти билан 22:00да бошланади. Қўшимча қилиш керакки, Ўзбекистон ва Вьетнам терма жамоалари 2012 йилнинг сентябрь ойида Вьетнамда ташкил этилган халқаро мусобақада ўзаро учрашишган. Ўшанда Ўзбекистон ёшлар терма жамоаси рақибдан кучлироқ эканлигини исботлаб, Вьетнам дарвозасига жавобсиз 4та гол уришга муваффақ бўлганди.