"Интер" Ромелу Лукаку борасида "Челси"га янги таклиф билан чиқди.
Инсайдер Фабрицио Романонинг ёзишича, “нерадзуррилар” бельгиялик ҳужумчи учун 30 миллион евро таклиф қилган. Бу "Интер"нинг Лукаку бўйича иккинчи таклифи - аввалроқ "Челси" бельгиялик футболчини 25 миллион еврога сотмагани хабар қилинганди. Клублар яқин соатларда музокара олиб боришади.
Хабар қилинишича, "Челси" Лукаку учун камида 40 миллион евро талаб қилмоқда - ҳозирча бу суммани фақат Саудиянинг "Ал-Ҳилол"и тўлашга тайёр. Бироқ, инсайдернинг фикрича, саудияликларнинг ҳужумчи билан шартнома имзолаш имконияти кам, чунки у фаолиятини Европада давом эттирмоқчи.
2022/23 йилги мавсумда Лукаку “Интер” сафида ижара асосида ўйнаган. Ҳужумчи А Серияда 25 та ўйинда майдонга тушиб, 10 та гол ва 6 та голли узатмани амалга оширган.
