"Ливерпул"нинг тўққизинчи рақами йиллар давомида энг яхши тўпурарлар томонидан фойдаланиб келинмоқда. Бу рақамнинг ўзига яраша тарихи бор. Бу тарихнинг яхши, ўрни келганда омадсиз томонларини бугун ёдга оламиз. Дарвин Нуньес янги мавсумдан бу рақамга эга чиқадиган бўлди. Шу хабар фонида 9-рақам тарихига назар ташлаймиз.
Энди Кэрролл
2011 йилда Британия тарихидаги рекорд сумма эвазига Энди Кэрролл "Ньюкасл"дан сотиб олинади. Мерсисайдликлар ҳужумчидан кўп нарса кутган эди. Харҳолда, 11 та голдан кўпроғини...
Тўққизинчи рақамда ҳаракат қилган ҳужумчи ишончларни тўлиқ оқлай олмади. У 58 тагина ўйинда майдонга туширилган эди. Кэрролл "Ливерпуль" билан лига кубогида ғалаба қозонади. Англия кубоги ярим финалида сўнгги сонияларда гол уриб, "Эвертон"ни мағлуб этади. Финалда ҳам "Челси"га қарши мағлубиятли баҳсда таблода унинг номи порлайди. Афсуски, буларнинг бари 35 миллионлик футболчи учун кам эди.
Жибриль Сиссе
Агарда ўша даҳшатли оёқ синиши бўлмаганида эди, Сиссенинг "Ливерпул"даги фаолияти, балки яхшироқ кечган бўларди. Франциялик ҳужумчи шундан кейин ҳам таслим бўлмади. У ҳозир мерсисайдликлар мухлислари томонидан ЕЧЛ финалида "Милан" устидан қозонилган ғалабадаги пенальтиси билан эсланади. Шунингдек, 2006 йилги кубок финалида ҳам Сиссе "Вест Хэм"ни мағлуб этган голга муаллифлик қилган.
Николя Анелка
Анелка "Ливерпуль" билан фақат ярим мавсумни бирга ўтказган. У "ПСЖ"дан ижарага олинади. Англияда француз ҳужумчисига тўққизинчи рақам тақдим этилади. У фақатгина 5 та голга муаллифлик қилган. Кейинги мавсумда "Ливерпуль" чемпионлик пойгасига киради. Афсуски, Анелка бу пайтда кетиб бўлганди.
Иан Раш
Иан Раш АПЛ ташкил топишидан анча илгари "Ливерпуль" билан бирга эди. Гарчанд унинг катта иши, 1992 йилдан олдин қилинган бўлса ҳам, АПЛ даврида Раш 45 та гол уришга эришади.
Роберто Фирмино
Кўпчилик "Ливерпуль" ҳужумчилари тарихини ҳар-хил баҳолайди. Кимдир учун биринчи ўринда Фирмино бўлиши керак, кимдир учундир бошқаси. Биз эса уни 3 ўринга қўйдик. Бразилиялик ҳужумчи Салоҳ ва Мане билан қўрқинчли триога айланган эди. У 2017-18 йилги мавсумни 27 та гол ва 17 та ассист билан тугатади. Фирмино "Ливерпуль" билан мумкин бўлган барча совринларни қўлга киритган.
Фернандо Торрес
Торрес, шубҳасиз АПЛ тарихидаги энг яхши ҳужумчилардан биридир. У тўққизинчи рақамга мос футболчи эди. Аммо испаниялик ҳужумчи мерсисайд клуби билан бирорта соврин юта олмаган. Қолаверса, у нисбатан қисқа вақт "Ливерпул"да ҳаракат қилади. Аммо унинг "Челси"га трансфери клубга катта фойда келтиради (50 миллион фунт).
Робби Фаулер
Худо! "Ливерпуль" мухлислари Фаулерни айнан шундай деб чақиришарди. Ҳужумчи тўрт мавсум давомида 188 та ўйинда майдонга тушиб, 116 та голга муаллифлик қилади. Инглиз ҳужумчисини кўрмаган авлодга, унинг ўйинларини YouTuBe дан томоша қилишини тавсия қилган бўлардик.
ИСМАТОВ Ж.
