Кеча Таиландда бўлиб ўтаётган футзал бўйича жаҳон чемпионатида 2-тур ўйинларига стар берилди. Куннинг қизиқарли учрашувларидан бири Португалия ва Япония терма жамоалари ўртасида кечди.

Ўйин бошидан ўз устунлигини намойиш қилишни бошлаган европаликлар 5:1 ҳисобида олдинга чиқиб олишди. Бўлим сўнгида ҳисобни биттага қисқартирган японияликлардан ҳеч ким иккинчи бўлимда қаҳрамонлик кутмаганди. Аммо мўжиза юз берди. Дастлабки 20 дақиқаликда 5та гол урган португалияликлар 2-бўлимда бирорта гол ура олишмаган бўлса, Япония ўйин тугашига 7 дақиқа қолганида 3та гол уриб, ҳисобни тенглаштирди — 5:5! Бразилия эса Ливияга "мастер-класс" ўтказди —  13:0. Гуруҳдан чиқиш учун 3та жамоада имконият борлигини инобатга олсак, японлар учинчи турда Ливияни мағлуб этишса, улар плей-оффда ўз юришларини давом эттиришади.

"А" гуруҳида Украина эса мезбонларга очко беришни истамади. Улар ҳам биринчи бўлимда рақиб дарвозасини 5 марта ишғол қилишганди. Таиланд эса иккинчи бўлимда украиналиклар дарвозасига 3 марта йўл топа олишди, холос. Дастлабки турда Украина билан дуранг ўйнган Парагвай бу сафар Коста-Рикага ютқазиб қўйди — 3:6.

Бугун "В" ва "D"гуруҳларида 2-тур ўйинлари бўлиб ўтади. "В" гуруҳининг Испания-Панама ўйинида Шуҳрат Пўлатов вақт учун масъул бўлади.

Футзал бўйича жаҳон чемпионати. 2-тур.
"А" гуруҳи
Парагвай - Коста-Рика - 3:6
Таиланд - Украина - 3:5

"С" гуруҳи
Португалия - Япония - 5:5
Бразилия - Ливия - 13:0