Бугун Қозоғистон кубоги ярим финалининг жавоб ўйинлари бўлиб ўтди. "Актобе" клуби биринчи ўйинда 0:5 ҳисобида имкониятни бой берганига қарамай, жавоб баҳсида вазиятни ўнглашга ва мухлисларни қувонтиришга интилишди.

Ўйинда мезбонлар 3:1 ҳисобида ғалаба қозонишди. Александр Гейнрих жамоасининг иккинчи голини киритишга муваффақ бўлди. Тўп бурчакдан етказиб берилганидан кейин Саша дарвоза томон 3 марта зарба бериб, учинчи уринишда тўпни дарвозага йўллади. Дастлабки иккита зарбани ҳимоячилар қайтаришга муваффақ бўлишди.

Ўйиннинг 79-дақиқасига келиб, ҳисоб 3:0га етди ва қолган 11 дақиқа давомида киритиладиган яна 2 гол ўйинни қўшимча бўлимларга кўчирарди. Бироқ 81-дақиқада павлодарликлар битта жавоб тўпини киритишди ва финал тақдирини ҳал қилишди. Боз устига, компенсация вақтида актобелик ҳимоячилар Улуғбек Бақоевни чалиб чиқитишди. Жабрланувчининг ўзи "нуқта" олдига яқинлашди ва дарвозабон Сидельников зарбани қайтаришга муваффақ бўлди.

Бу ўйинда Гейнрих ва Бақоев 90 дақиқа, Бикмаев эса 60 дақиқа тўп сурди. Темур Кападзе эса жароҳат туфайли ўйинда иштирок этмади.

Иккинчи ярим финалда эса "Астана" клуби амалдаги чемпион — "Шахтёр"ни 2:0 ҳисобида мағлуб этиб, финалга чиқди. Биринчи ўйинда қарағандаликлар ўз майдонларида 2:1 ҳисобида ғалаба қозонишганди.

Демак, финалда "Астана" ва "Иртиш" клублари тўп суришади. Финал баҳси 11 ноябрь куни бўлиб ўтади.