Венгриянинг "Ференцварош" клуби собиқ бош мураббийи Станислав Черчесов Роберто Фирмино ва Эдуард Менди ўйнаётган "Ал-Аҳли" жамоасини бошқариши мумкин.
"Матч ТВ" телеканалининг маълумотларига кўра, 59 ёшли мутахассис ўз келажаги ҳақида қарор қабул қилишга шошилмаяпти.
"Унинг "Ференцварош"да мақсадлари ва вазифалари бор эди, уларга эришишни режалаштирган эди, шунинг учун у ҳали ҳеч ким билан музокарага киришмади. Станислав Саламович жуда принципиал инсон. Ҳозир эса у шошқалоқ қарорлар қабул қилмайди", — деди манба.
Эслатиб ўтамиз, Черчесов Чемпионлар лигаси саралашининг биринчи босқичини тарк этгач, Венгрия клуби бош мураббийлигидан бўшатилган эди.
