"Манчестер Юнайтед"нинг собиқ ярим ҳимоячиси Давид Бекхэм нима учун клубнинг ҳозирги хўжайинлари ака-ука Глейзерлар жамоани янги инвесторларга сотишлари кераклиги ҳақида батафсил гапириб берди.

"Мухлис ва собиқ футболчи сифатида ҳаммаси ҳал бўлишини истайман. Клубимиз кимга тегишли бўлса, биз уларнинг иштиёқли бўлишини, фаол иштирок этишини, тўғри қарор қабул қилишини, тўғри ўйинчиларни жалб этишини ва клубга сармоя киритишини истаймиз. Чунки клубга ҳақиқатан ҳам сармоя керак, хоҳ у машғулот иншооти, ​​хоҳ стадион, хоҳ майдон бўлсин... Бу каби муҳим ишларни қилиш керак, ўзгаришлар ростдан ҳам бўлиши керак. Айниқса, "Манчестер Сити" нималар қилаётганини ҳамма кўриб турган бир паллада.

Гап фақат "Манчестер Сити"нинг ғалаба қозонаётганида эмас. Уларнинг келажагини мавсумдан мавсумга қандай қураётганини кўришингиз мумкин. Уларда Пеп билан барқарорлик бор, мен бунга қойил қоламан.

"Манчестер Юнайтед" турнир жадвалида биринчи ўринда эди, биз ҳамма нарсани ютдик, биз муваффақият қозонган жамоа бўлдик, футболчилар ўйнашни хоҳлайдиган жамоа эдик. Биз ҳаммасини қайтариб олишни хоҳлаймиз ва қарор қанчалик тез қабул қилинса, шунча яхши.

Глейзерларнинг кетиш вақти келдими? Менимча, вақт келди. Мухлислар буни хоҳлаётгани учун. Мухлисларни бир марта йўқотиб қўйсангиз, айниқса, "Манчестер Юнайтед"дек клубда уларни қайтариб олиш қийин. Шубҳасиз, Глейзерлар кўп нарсага эришдилар, аммо ўзгариштириш қилиш керак. Биз буни ҳаммамиз кўрамиз, ҳаммамиз биламиз”, - деди Бекхэм The Athletic билан суҳбатда.