Ўзбекистон ёшлар терма жамоаси КХДРга қарши баҳснинг эртаси куни эрталаб Рас ал-Хайма шаҳридаги соҳил бўйида тикланиш машғулотларини олиб боришди. Шимолий Кореяга қарши ўйинда футболчилар кўп куч йўқотишди ва шунинг учун соҳил бўйидаги енгил югуриш ва сувдаги машқлар тикланиш учун фойдали бўлди.

Кунннинг қолган қисми эса сокин ўтди, десак ҳам бўлади. Мураббийлар штаби кечқурунги машғулотни ўтказишмади ва футболчилар дам олиб, куч тўплаш имкониятига эга бўлишди. Кечки овқатдан кейин жамоа Сурия иштирокидаги ўйинлар видеосини томоша қилишди.

Сурияга қарши чорак финал баҳси жуда муҳим аҳамиятга эгалиги ҳеч кимга сир эмас. Ушбу ўйинда муваффақият қозонган жамоа Осиё чемпионатининг ярим финалига чиқиш билан бирга, келаси йили Туркияда бўлиб ўтадиган жаҳон чемпионатида қатнашиш ҳуқуқини ҳам қўлга киритади.

Сурияга қарши баҳс 11 ноябрь куни Фужайра шаҳрида бўлиб ўтади. Сурияликлар ўзларининг гуруҳдаги барча баҳсларини айнан шу шаҳардаги "Фужайра" стадионида ўтказишди. Шунинг учун улар стадионга мослашиб олишган. Ўзбекистон эса бу шаҳарга илк марта ташриф буюради. Рас ал-Хайма ва Фужайра шаҳарлари ўртасидаги масофа 120 км.ни ташкил қилади. Делегация аъзолари айнан ўйин куни автобусда 2 соат йўл босиб, Фужайрага етиб келишади. Футболчиларимиз бу ўйинда машғулот ўтказмасдан туриб, дарҳол ўйинг тушишади.

Ўйинолди машғулотини жамоамиз бугун Рас ал-Хайма шаҳридаги "Захма" стадионида ўтказади. Сурияга қарши чорак финал ўйини маҳаллий вақт билан соат 15:00да бошланишини инобатга олган ҳолда, машғулот бугун 16:00да бошланади.

Ёшлар ўртасида Осиё чемпионати.
Чорак финаллар. 11 ноябрь, якшанба
16:00. Фужайра. Ўзбекистон - Сурия
18:00. Рас ал-Хайма. Эрон - Жанубий Корея
20:00. Фужайра. Австралия - Иордания
22:00. Рас ал-Хайма. Ироқ - Япония

Ярим финал, 14 ноябрь, чоршанба
Ўзбекистон/Сурия - Эрон/Жанубий Корея
Австралия/Иордания - Ироқ/Япония

Финал, 17 ноябрь, шанба
Рас ал-Хайма. "Эмирейст" стадиони.