"Тоттенхэм" клуби ҳужумчи Харри Кейнни "Бавария"га 100 миллион евродан кўпроққа сотса, пулни қайси трансферларга сарфлашини ҳал қилди.
Mundo Deportivo нашри хабарига кўра, "шпорлар" бу маблағнинг бир қисмини "Барселона"нинг икки футболчиси учун сарфламоқчи.
Гап ўтган мавсумда "шпорлар"да ижара асосида ўйнаган ҳимоячи Клеман Лангле ва "Барселона" ярим ҳимоячиси Френк Кессье ҳақида кетмоқда. Ивуарлик футболчи 35 миллион еврога баҳоланган бўлса, франциялик футболчининг нархи 15 миллион атрофида бўлиши мумкин.
Эслатиб ўтамиз, Кейн ўрнига "Тоттенхэм" аввалроқ Франкфуртнинг "Айнтрахт" клуби ҳужумчиси Рандал Коло-Муани ўринбосар ҳисобланган.
