Кеча Қозоғистонда мавсумнинг энг сўнгги ўйини бўлиб ўтди. Астана шаҳрида бўлиб ўтган Қозоғистон кубогининг финалида "Астана" жамоаси "Иртиш" билан куч синашди.

Ўзбекистон терма жамоасининг йиғини ва Эронга қарши ўйини туфайли Улуғбек Бақоев ушбу ўйинда иштирок эта олмади. Кубок эса "Астана" клубига насиб этди. Ўйин бошида Нурдаулетов ва ўйин сўнгида Нусербаев томонидан киритилган голлар стадион мезбонларига ғалаба келтирди.

Ўйиндан кейинги матбуот анжуманида ҳамкасбларимиз "Иртиш" бош мураббийи Талғат Байсуфиновга Улуғбек Бақоев ҳақида савол беришди.

— Бақоев ушбу ўйинда иштирок этмади. Агар сизда ўйинни бошқа муддатга кўчириш имконияти бўлганида ундан фойдаланган бўлармидингиз?
— Албатта, Бақоев ўйинда иштирок этишини хоҳлаган бўлардим. Аммо вазият шундай бўлиб қолди. Бугунги ўйинда "Астана" гол ура олди, биз эса йўқ. Ўз навбатида Улуғбекнинг йўқлиги биз учун муаммо бўлди, деб айта олмайман. У асосий таркибнинг барча ўйинчилари каби футболчи. Жамоа учун ишлайди ва жамоавий ўйин руҳиятига бўйсунади.