Англия терма жамоаси сардори Харри Кейн Премьер-лиганинг янги мавсуми бошланишидан олдин сотилмаса, "Тоттенхэм"да қолади. Премьер-лиганинг 2023/2024 йилги мавсуми 11 август куни бошланади. 13 август куни "Тоттенхэм" "Брентфорд" билан ўйнайди.
Қайд этилишича, Кейн клуб ва янги бош мураббийни ҳурмат қилгани учун мавсум бошланганидан кейин жамоани тарк этишни истамаяпти.
Ўз навбатида, "Бавария" "шпорлар" етакчиси билан 5 йиллик шартнома имзолашига ишонч билдирмоқда. Аввалроқ, икки клуб вакилларининг учрашуви натижалари маълум бўлганди.
Кейн "Тоттенхэм" тарбияланувчиси ҳисобланади. Лондон клуби сафида ҳужумчи 435 ўйин ўтказиб, 280 гол урган ва 64 голга ассистентлик қилган. Ўтган мавсумда 30 ёшли футболчи 49 ўйин ўтказиб, 32 гол урди ва 5 голга ассистентлик қилди. Унинг "Тоттенхэм" билан шартномаси 2024 йилнинг ёзига қадар мўлжалланган.
