"Наполи" "Сельта"нинг испаниялик ярим ҳимоячиси Габри Вейга учун курашга қўшилди.
Таниқли журналист Фабрицио Романонинг ёзишича, "Наполи" ёш иқтидор соҳибини 30 миллион еврога сотиб олиш бўйича расмий таклиф билан чиқишган.
Хабарларга кўра, Вейганинг ҳозирги клуби бошлиқлари бу таклифни рад этишган. Чунки, "Сельта" товон пули сифатида 40 миллион евро талаб қилмоқда. Бироқ, Романонинг сўзларига кўра, музокаралар давом этмоқда, чунки "Наполи" Вейга билан шартнома имзоламоқчи.
Эслатиб ўтамиз, Габри "Сельта" тарбияланувчиси бўлиб, барча турнирларда 55та ўйин ўтказиб, 11та гол ва 4та голга ассистентлик қилган. Transfermarkt портали 21 ёшли ҳужумкор футболчининг нархини 30 миллион еврога баҳоламоқда.
