Грециянинг ПАОК клуби россиялик ярим ҳимоячи Магомед Оздоевнинг трансфери ҳақида ўзининг ижтимоий тармоқларида расман эълон қилди.

Аввалроқ Истанбулнинг "Фотиҳ Карагумрюк" жамоасида ўйнаган россиялик футболчи кейинги икки мавсумни Греция чемпионати гранди билан ўтказади.

Эслатиб ўтамиз, Оздоев ўтган мавсумни "Зенит"ни эркин агент сифатида тарк этганидан кейин Туркия чемпионатида ўтказди. Андреа Пирло бошчилигидаги "Фотиҳ Карагюмрюк" таркибида Суперлигада бешта гол уриб, жамоанинг энг яхши ва ажралмас футболчиларидан бирига айланди.

Тахминларга кўра, греклар турк клубига россиялик ярим ҳимоячи учун 1 миллион евро тўлаган. ПАОК ўтган мавсумни Греция чемпионатида тўртинчи ўринда якунлади ва УЕФА Конференциялар лигаси гуруҳ босқичига чиқиш учун саралаш ўйинларида иштирок этмоқда. Клуб бош мураббийи таниқли руминиялик мураббий Мирча Луческунинг ўғли - Разван Луческу ҳисобланади.