Аҳмаджон Мусаев қўл остидаги Ўзбекистон ёшлар терма жамоаси 17 ноябрь, шанба куни, куннинг иккинчи ярмида БААдан Тошкентга етиб келди.

3-17 ноябрь кунлари БААнинг Рас ал-Хайма ва Фужайра шаҳарларида ёшлар ўртасидаги 2012 йилги Осиё чемпионати баҳслари бўлиб ўтди. Унда Ўзбекистон ёшлар терма жамоаси ҳам иштирок этди. Аҳмаджон Мусаев шогирдлари мусобақа гуруҳ босқичида Вьетнам ва Шимолий Корея терма жамоаларини мағлубиятга учратишди, Иордания ёшлари билан дуранг ўйнашди.

2013 йили Туркияда бўлиб ўтадиган жаҳон чемпионати йўлланмаси тақдири ҳал этилган чорак финал ўйинида Ўзбекистон ёшлар терма жамоаси мусобақадаги энг мураккаб жамоаларидан бири бўлган – Сурия терма жамоасини пенальтилар сериясида мағлубиятга учратиб, Осиё чемпионати ярим финалига ҳам йўл олди. Ярим финал ўйинида Мусаев шогирдлари, охир-оқибат мусобақа чемпионига айланган Жанубий Корея ёшлар терма жамоасига имкониятни бой беришди.

Нима бўлганда ҳам, Ўзбекистон ёшлар терма жамоаси ўз олдига қўйилган вазифани бажарди – 2013 йилги ёшлар ўртасидаги жаҳон чемпионати йўлланмасини қўлга киритди. Ўзбекистон ёшлар терма жамоаси бунгача 2003 (БАА)ва 2009 (Миср) йилги жаҳон чемпионатларида иштирок этган эди. Қайд этиш жоиз, 2012 йилнинг октябрь ойида Ўзбекистон ўсмирлар терма жамоаси ҳам 2013 йилги ўсмирлар ўртасидаги жаҳон чемпионати йўлланмасини қўлга киритган эди. Шундай қилиб, ўзбек футболи тарихида илк бора ҳам ўсмирлар, ҳам ёшлар терма жамоалари бир йилда жаҳон чемпионатида иштирок этадиган бўлишди.